Асрор Алиқулов Навоийдаги 3:3,"Шўртан"даги тақдири ва ўйинни бошқарган аёл ҳакамлар ҳақида нима деди?

Чемпионатнинг сўнгги турида “Шўртан” клуби Навоийда “Қизилқум”га қарши майдонга тушди ва голларга бой ўтган ўйин жанговар дуранг - 3:3 билан тугади. Учрашувдан кейин “Шўртан” бош мураббийи Асрор Алиқулов матбуот анжуманида иштирок этди.

-Голларга бой ўйин кўрдик. Ўйин мухлисларга ёқди. Бунинг учун футболчиларга миннатдорлик билдираман. Биринчи бўлимда кўпроқ ҳимояга эътибор қаратдик. Учрашув охирида ҳужумга кўп урғу бердик. Ғалаба қозонишни хоҳладик. Афсуски, охирги сонияларда ғалабани қўлдан чиқардик. Майдонда ўйнаган ҳар бир футболчи ўзини яхши томондан кўрсатишга ҳаракат қилди. Бу мавсумни охирги учрашуви эди. Йигитларга меҳнати учун миннатдорчилик билдираман.

- “Шўртан” қийин вазиятдан чиқиб кета олишини кўрсатди. Ўйин давомида мағлубиятдан қутулди ва ҳисобда олдинга чиқиб олди. Охирида эса ғалаба қўлдан чиқарилди. Мана шундай пайтда мураббийларда қандай ҳис-туйғулар кечади?

- Бу оддий хато. Ҳимоячиларга кўп уқтирамиз. Тўп узатиш, қўполлик, жарима тўпи бизни дарвозамиз олдида. Кераксиз жойда қоида бузиш...Охирги сонияларда сергакликни оширишимиз керак эди. Бироқ стандартдан гол ўтказиб юбордик. Ўзимизни қўлимизда эди, вазиятни бу ҳолатгача олиб келмаслигимиз керак эди.

- Ўзбек футболи тарихида биринчи марта аёл ҳакамлар Суперлига ўйинини бошқаришди. Сизнинг ҳакамлик ҳақидаги фикрингиз қандай?

- Суперлигада биринчи марта аёл ҳакамлар ўйинни бошқаришди. Аёл ҳакамда темпга тушиш ва ҳис-ҳаяжон бўлиши мумкин, деган фикр ўтди. Лекин ўзини яхши тутди, яхши ҳакамлик қилди. Ҳеч қанақа эътирозимиз йўқ. Биринчи учрашув учун аёл ҳакам ўйинни жуда яхши бошқарди.

- Кейинги режангиз қандай? “Шўртан”да қоласизми ёки таклифлар борми?

- “Шўртан”да қоламан ва жамоани про лигадан Суперлигага қайтаришимиз керак. Клуб раҳбарлари охирги йилларда жамоа учун жуда кўп ишлар қилишди. “Шўртан” Суперлига даражасидаги жамоа. Ҳомийимиз ҳам бизни қўллаб-қувватлаяпти. Келаси йили “Шўртан”да қолиб, клубни Суперлигага қайтармоқчимиз.