Асрор Алиқуловни жамоасининг қайси камчилиги қийнамоқда?

Про лиганинг 5-турида Муборакнинг “Машъал” жамоаси сафарда “Бухоро”га қарши муҳим учрашувда майдонга тушди. Шиддатли кечган баҳсда дарвозалар даҳлсиз қолди – 0:0. Баҳсдан кейин “Машъал” устози Асрор Алиқулов таассуротлари билан ўртоқлашди.

- Эҳтиёткор ўйин бўлди, десам тўғри бўлади. Иккала жамоа – биз ҳам, “Бухоро” ҳам эҳтиёткорлик ва хатога йўл қўймаслик ҳақида ўйладик. Қайсидир ҳолатда футболчиларимизда ички ҳолатда босим сезилди. Лекин иккинчи бўлимда футболчиларимиз анча ўйин ритмига мослашишди. Дурангга мос ўйин бўлди, дейишим мумкин. Стандарт ҳолатлар ва бўйдор ўйинчиларига қарши тайёргарлик кўргандик. Барибир айрим вазиятларда дарвозамизга хавф туғдиришди.

- “Бухоро”га ўхшаган жамоалар билан ўйнаш қанчалик қулай ёки ноқулай? Чунки “Бухоро” асосан кучга таянган ва юқоридан паслар орқали футбол ўйнайди.

- Биринчи навбатда бу футболчиларнинг савияси. Кўрдингиз, бўш зоналари йўқ. Икки марказий ҳимоячисининг ўйинини ўргандик. “Бухоро” дарвозасига голли вазият яратиш жуда қийин. Айтиш мумкинки, бугунги ўйин учун бирга-бир имкониятга эга чиқдик. Айниқса, учрашувнинг охирги сонияларда Хумоюнда ҳам вазият бўлди.

- Жамоа ҳали ўз дарвозасидан тўп ўтказиб юборгани ва мағлубиятга учрагани йўқ. Клуб олдига қўйилган вазифаларни футболчилар қанчалик бажаряпти ва бу натижалар фонида камчиликлар ҳам кўриняптими?

- Камчилик кўп. Кўряпсиз, бош билан, иккинчи қаватда ўйнаш бўйича футболчиларимизда камчиликлар бор. Шуларга эътибор қаратяпмиз. Ҳимоядан ҳужумни бошлашда ҳам бироз камчиликларимиз билиняпти. Ҳаяжон бор. Ўзига ишончни яхши ҳис қилишмаяпти. Улар бундай камчиликларни тезроқ бартараф қилишларини хоҳлаймиз. Умид қиламизки, яқин кунларда яхшироқ футбол кўрсатамиз.

- Умид Ҳамроевда қўшимча куч пайдо бўлдими? У ҳар бир учрашувда 100 фоизли голларни қайтаряпти.  

-  Умидни жамоамизга таклиф қилгунимизга қадар унинг ўйин услубини, “Шўртан”даги фаолиятини таҳлил қилганимизда кўп эътибор қаратганман. “Хоразм”даги ўйинлари орқали ҳам дарвозабонлар ичида яхшироқ савиядалигини кўрсатган. Шунинг учун жамоамизга таклиф қилганмиз. Кўз тегмасин, Умид ўзига билдирилаётган ишончни оқлаяпти, ундан бундан ҳам яхшироқ ўйинларни кутиб қоламиз.