Айёр ечим! “Сити” Родрини бериб, “Реал”нинг суперюлдузини олмоқчи

“Манчестер Сити” бош мураббийи Хосеп Гвардиолага “Реал”да порлаётган Арда Гюлер керак. Испаниялик мураббий турк футболчисини ўз жамоасига кўришни истаяпти.

Defensa Central нашрининг ёзишича, “шаҳарликлар” бу трансферни амалга ошириш йўлларини қидирмоқда. Ҳозирча, бир ечим ўртага ташланди.

Унга кўра, манчестерликлар Родри ва Гюлер рокировкасини таклиф қилмоқчи. “Манчестер Сити” мутасаддилари “Қироллик клуби” анчадан бери “Олтин тўп” соҳибини кўзлаб юрганини билади.

Бироқ трансфер бўйича экспертлар бу режа иш беришига ишонмаяпти. Гап шундаки, Родри ўтган йилги оғир жароҳатдан кейин ҳали ўзига келгани йўқ. 29 ёшли футболчи шикастланишга мойил бўлиб қолган.

Арда Гюлер эса, жамоани Хаби Алонсо қабул қилиб олганидан кейин “Реал”да асосий фигуралардан бирига айланди. Ўтган мавсумда бир неча бор клубдан кетиши ҳақида гапирган туркиялик ярим ҳимоячи энди Мадриддан узоқлашишни истамаяпти.