Азар АПЛга йўл олиши мумкин

Дортмунднинг “Боруссия” клуби ярим ҳимоячиси Торган Азар Германия Бундеслигасини Англия Премьер-лигасига алмаштириши мумкин. “Bild” нашри хабарига кўра, 29 ёшли футболчининг трансферига "Ньюкасл" жиддий тарзда қизиқиш билдирмоқда.

Клуб ўтган мавсум Саудия Арабистони инвесторларининг қўлига ўтди. Ёзги трансфер ойнаси пайтида “янги бойлар” кўплаб футболчиларни сотиб олиши кутилмоқда. Бельгия терма жамоаси аъзоси “Ньюкасл”нинг “шорт-листи”дан ўрин олган футболчилардан бири ҳисобланади.

Торганнинг трансфери учун "оқ-қоралар" 15 миллион евро тўлашга тайёр. Унинг "Боруссия" билан амалдаги шартномаси 2024 йилнинг ёзига қадар мўлжалланган. “Тransfermarkt” портали бельгиялик хавбекнинг нархини 15 миллион евро этиб белгилаган.

Торган "Реал" ярим ҳимоячиси Эден Азарнинг укаси ҳисобланади. У ўтган мавсум Германия чемпионати доирасидаги 23 та учрашувида майдонга тушиб, 4та гол ва битта голли узатмага муаллифлик қилган.