Баҳром Ҳайдаров: Ҳамма хато қилади, ҳакам ҳам

Ўзбекистон Суперлигаси 3-туридан ўрин олган “Сурхон” – “Насаф” (1:2) баҳсидан сўнг, мезбонлар устози Баҳром Ҳайдаров учрашув борасидаги ўз фикрларини билдириб ўтди. 

“Насаф” яхши футболчиларга эга бўлган жамоа. Рақиб тўпни яхши назорат қилади. Қарши ҳужум борасида энг кучли жамоалардан бири. Беллашувни яхши бошлаган эдик. Сўнг, биринчи бўлимда рақиб устунликни қўлга олди. Рикошет вазиятдан сўнг юзага келган гол йигитларнинг руҳиятига салбий таъсир кўрсатди.

Иккинчи бўлимда ҳисобни тенглаштиришга эришдик. Қарши ҳужумдан сўнг ўтказиб юборилган гол боис, яна беллашувнинг бориши ўзгарди. Бугун ғалаба қозонишимиз ҳам мумкин эди. Чунки, голдан сўнг қарши ҳужумни ўтказиб юбормасак, яхши ўйин кетаётган эди.

“Сурхон” жамоасида яхши футболчилар йиғилган. Улар ҳали ўз сўзини айтишади. Мағлубиятдан хулоса чиқариб, келгуси беллашувларда ғалаба қозонишга ҳаракат қилиш керак.

Менда ҳакамнинг қарорларини муҳокама қилиш ҳуқуқи йўқ. Буни ўрганиб чиқадиган ташкилотлар бор. Лекин ҳакам ҳам хато қилади, ҳамма хато қилади. Футболчи ҳам хато қилади. Аммо биз ҳар бир хатога тайёр туришимиз лозим. Шунинг учун, ҳакам хато қилди, дейишдан фойда йўқ. Муҳими биз – ўзимизнинг хатоларимиз устида ишлашимиз керак”, – деди Ҳайдаров.

Матнда хатолик топсангиз, ўша хатони белгилаб, бизга жўнатинг (Ctrl + Enter)