Бектемир тайёр! WBA жаҳон чемпионлиги жангини Ўзбекистонда ўтказишмоқчи

WBA версиясида жаҳон чемпионлиги учун мажбурий даъвогар бўлган ўзбекистонлик машҳур боксчи Бектемир Мелиқўзиев мексикалик чемпион Хайме Мунгиа ундан қочаётганини айтди ва рақибини қўшимча ҳақ эвазига жангни Ўзбекистонда ўтказишга чақирди.

«Жамоам олдига бир аниқ вазифа қўйилган эди: бу жангни амалга ошириш ва менга жаҳон чемпионилик камари учун курашиш имкониятини бериш учун қўлимиздан келган барча ишни қилиш.

Биз улар қўйган барча шартларга рози бўлдик, барча шубҳаларини йўққа чиқардик. Мен Хайме Мунгиа билан қисқа тайёргарлик муддатида, тўлиқ машғулот йиғинисиз жанг қилишга рози бўлдим. VADA допинг назоратисиз жангга чиқишга ҳам кўндим, гарчи биз доимо бу тест ўтказилишини талаб қилиб келган бўлсак-да. Ҳатто энг кам гонорарга ёки умуман гонорарсиз жанг қилишга ҳам рози бўлдим.

Бу жанг бўлиб ўтиши учун мумкин бўлган барча имтиёзларни бердик. Шунга қарамай, жамоам ҳозир менга Мунгиа ҳали ҳам мен билан жанг қилишдан бош тортаётганини айтди.

Шунинг учун менинг битта оддий саволим бор: нега ҳалигача промоутерлик савдолари эълон қилинмади? Агар чемпион мажбурий ҳимоя жангини ўтказиш мажбуриятини бажаришдан бош тортса, нега ҳалигача ундан чемпионлик камари олиб қўйилмади?

Мен узоқ вақтдан бери қўлга киритган ҳуқуқим — бу имкониятни олиш учун яна нима қилишим керак? 

Умуман олганда, кимдир Мунгиа ва унинг жамоасидан сўрадими: нега у ўзининг мажбурий даъвогарига қарши жанг қилишни истамаяпти? Балки у ҳурмат қилиш мумкин бўлган сабабни айта олар? Агар у камида шу сабабни бутун дунёга очиқ айтса, у ҳақиқатан жиддий бўлса, мен бунга ҳурмат билан муносабатда бўламан. Мажбурий даъвогар ва қоидалар йўқдек тутушни бас қилиш керак.

Эшитишимча, у осон рақибга қарши жанг учун бир миллион доллар олиши керак эди, лекин менга қарши жанг учун яна кўпроқ пул талаб қилмоқда, бу учун эса бюджет йўқ. Улар мендан текинга жанг қилишимни, устига-устак Мунгиага ўзига ҳам пул қўшиб беришимни кутаяптими? Муаммо йўқ. Кел, жангни Ўзбекистонда ўтказайлик — сенга менга қарши рингга чиқишинг учун қўшимча пул ҳам берамиз!», — деб ёзди Мелиқўзиев ўзининг инстаграм саҳифасида.

Мелиқўзиев ва Мунгиа ўртасидаги вазият WBA расман мексикалик чемпионини иккинчи ўрта вазн тоифасида ўз камарини зудлик билан ҳимоя қилишга мажбур этганидан сўнг кескинлашди. Мажбурий даъвогар мақомини Бектемир бир йилдан ортиқ вақтдан бери сақлаб турибди.

Мунгиа томони эса бу жангдан қочишга уринаётгани, Мелиқўзиевга бошқа рақибга қарши ихтиёрий жанг ўтказиш учун пул таклиф қилаётгани айтилмоқда. Бироқ Бектемир бу таклифни рад этди, чемпион томонини спортга нисбатан ҳурматсизликда айблаб, Мунгиа билан текинга жанг қилишга ҳам тайёр эканини очиқ баён қилди.

Томонларга 21 октябргача музокаралар олиб бориш учун вақт берилган. Агар шу муддатгача келишувга эришилмаса, WBA жанг ҳуқуқи учун промоутерлик савдоларини эълон қилади.