"Балки "Пахтакор" омадлироқ бўлар, "Насаф" келажаги бор жамоа" - Суперкубок олдидан мутахассис яна нималарни айтди?

Бугун Ўзбекистон Суперкубоги бор. Жиззахда “Пахтакор” ва “Насаф” ғолиблик учун майдонга тушишади. Соврин эгаси битта ўйинда аниқланиши боис ҳамманинг эътибори бўлажак учрашувга қаратилган, десак муболаға қилмаймиз. Майдонда мамлакатимизнинг икки етакчи ва совриндор жамоалари Суперкубокни ютиш учун куч синашар экан, ортиқча таърифга ҳожат йўқ.

Таниқли мутахассислардан бири, ЎФАда фаолият олиб бораётган Усмон Тошев Суперкубок ўйини олдидан ўз фикрлари билан ўртоқлашди.  

“Илгари “Насаф”да ишлаганман ва мураббий бўлиб ҳам. Суперкубокда энг юқори даражадаги футболни кўришни истаймиз. Иккала жамоада ажойиб ўйинчилар бор. Шунинг учун биз жуда қизиқарли ва жанговар ўйин кутяпмиз. Албатта, “Насаф”да фаолият олиб борганимга анча йиллар бўлди. Кўп нарсалар ўзгарган. “Пахтакор”ни ҳам биламиз, мураббий ҳамда футболчиларини. Иккита яхши жамоа ўртасидаги ўйинга гувоҳ бўламиз”.

Бу ўйинда дуранг бўлмайди, кимдир ютиши шарт ва мажбур. Яхши биласиз, бундай тўқнашувлар ғолиб асосий вақтда аниқланмаса қўшимча вақтлар берилади ва унда ҳам кучлар тенг келиб қолса, пенальтилар серияси орқали ғолиб жамоа номи аниқланади. Хўш, бугун Жиззахдаги учрашувда баҳс тақдири 90 дақиқа ичида ҳал қилинадими? Тошев шундай деди:

“Ҳамма нарса бўлиши мумкин. Лекин ҳозирги футболга қарасангиз, охирги дақиқаларда қанча голлар уриляпти, ўзимизни чемпионатда ҳам шундай. Голларни қарасангиз 90- ёки 90+7-дақиқаларда уришяпти. Демак, Суперкубокда ҳам шундай бўлиши мумкин. Кўп гол бўлади, деб ўйламайман, барибир бу футбол. Балки учрашувнинг охирларида кимдир гол уриб кетиши мумкин. 100 фоиз биламанки, мураббийлар бир-бирларини таҳлил қилган, яхшилаб ўрганиб чиққан. Иккала жамоа охиргича курашишади. Бу Суперкубок ва битта ўйиндан иборат. “Настрой” ҳам шунга яраша бўлади”.

Барибир қайсидир жамоанинг ғалаба қозониш имконияти борасида турли қарашлар мавжуд ва табиийки, ҳар ким ўз фикрига эга. Усмон Қудратовичдан кимнинг ғолиб чиқиш имконияти юқорироқ деб сўраганимизда қуйидагича жавоб қайтарди:

“Билмадим. Балки “Насаф” охирги ўйинларда сустроқ ўйнаётгандек. Кўраётган бўлсангиз, очколар олиши қийинроқ кечяпти. “Пахтакор” яхши ўйнаяпти ва очколарини қўлга киритяпти. Балки “Пахтакор” омадлироқ бўлар. Аммо “Насаф”нинг ҳам ўйини жуда яхши. Футболчилари бир-бирини яхши тушунишади. Чемпионат билан Кубок ўйинлари фарқли. Олдиндан кимнидир ютади, деб айтиб бўлмайди. Имкониятлар 50х50”.

Шунингдек, бу ўйин Рўзиқул Бердиев учун “Насаф” бош мураббийи сифатида охиргиси бўлиши мумкинлиги борасида гап-сўзлар йўқ эмас. Агар қаршиликлар ютқазса Бердиев истеъфога чиқиши ҳақида миш-мишлар йўқ эмас. Бу хусусида ҳам Усмон Тошевнинг фикрлари билан қизиқдик.

“Биласизми, бунақа саволлар мени қониқтирмайди. Бирорта мураббий йўқки, доим ютадиган. Ҳамма ҳам ютқазиши мумкин. У анча йил ишлади ва “Насаф”ни кўтарди. Билмадим, бундай гап-сўзларни ким ўйлаб топаркин? Ҳаммасини клуб раҳбарияти ҳал қилади. Ўйлайманки, бундай гаплар асоссиз. “Насаф” келажаги бор жамоа. Ҳамма клубларимизда яхши мураббийлар ишлашяпти”.

Ҳа, иккала клуб таркибида яхши савиядаги ўйинчилар етарлича ва айниқса, индивидуал жиҳатдан тажрибали футболчилар ҳам бор. Суперкубокдаги ўйин тақдирини айнан индивидуал маҳорати юқори ижрочилар ҳал қилиши мумкинми?

“Балки. Индивидиуал яхши ўйнай оладиганлар “Насаф”да ҳам, “Пахтакор”да ҳам бор. Ҳамма нарса бўлиши мумкин. Яна қайтараман: бу битта ўйин ва ғолиб фақат шу ўйинда аниқланиши шарт. Агар чемпионатда ва чемпионлик ўйини бўлса, бу бошқача бўлади. Суперкубок эса умуман бошқача. Исталган мамлакат Кубок финалига қарасангиз, ҳал қилувчи учрашувда ҳатто иккинчи лига жамоаси ҳам олий лигадаги клубни ютиши мумкин”, -  дейди Усмон Қудратович.

Шуҳратбек Жўраев.