Барқарор бўлмаган беқарорлар баҳсида жамоавий футбол устун келди (Ўйин ҳақида)

Европа Чемпионлар лигаси чорак финалнинг иккинчи кунида каттароқ афиша бу - ПСЖ - "Барса" баҳси эди. Кутилмалар турли бўлган мазкур беллашувнинг якуни кўпчилик учун бироз кутилмаган бўлди. Луис Энрике бошчилигидаги ПСЖ Мбаппе каби "йиртқич" ҳужумчисига эга бўла туриб ўз майдонида "Барселона"га имкониятни бой берди. Ҳа, бу баҳснинг фаворити айнан Париж гранди эди. Келинг, ўйинда нималар содир бўлганини яна бир эслаймиз! 

Биринчи бўлим! 

Биринчи таймнинг аввали Париж клубининг устунлиги билан бошланди. Илк дақиқаларда бироз тажовузкорлик намойиш этган Луис Энрике шогирдлари, гарчи, устунлик қилган бўлса ҳам сифатли ҳужумлар уюштиришни уддасидан чиқмади. Ли Кан Ин ва Асенсионинг олисдан йўллаган зарбаларигина эсда қолди. Кичик босимдан чиқиб кета олган "Барселона" таймнинг қолган қисмида назоратни ўз қўлига олди. Бурчак зарбаси амалга оширилгач, Левандовски Доннаруманинг хатосидан фойдаланиб, деярли бўш қолган дарвозага зарба йўллади, аммо Мендеш тўпни чизиқ устидан олиб чиқди. Бундан ташқари, Рафиньянинг олисдан йўллаган зарбаси ва яна бир қатор охирига етмай қолган чиройли ҳужумлар "Барса"нинг ПСЖдан устун ҳаракат қилаётганини кўрсатиб турарди. Ниҳоят, бу устунлик 37-дақиқада ҳисобга ҳам кўчди. Ямалнинг қанотдан берган узатмасидан сўнг ҳужум марказидаги Левандовски ақлли ҳаракат билан тўп Рафиньяга бориб тушишини таъминлади. Фокусни польякка қаратган ПСЖ ҳимоячилари ва дарвозабонини Рафинья жазолади ҳамда бўш қолган дарвозага хотиржамлик билан зарба йўллаб, беллашувда ҳисобни очди. Тушунарсиз футбол намойиш этаётган Париж гранди голдан кейин ҳам ўзига кела олмади. Таймнинг қолган қисми ҳам меҳмонларнинг назоратида, мезбонларнинг эса мавҳум ҳаракатлари билан ўтди. 

Иккинчи бўлим! 

Иккинчи таймда Луис Энрике қандайдир ўзгаришларга қўл уриши кутилганди. Ҳужум марказига Асенсиони қўйган мураббий бу қарори хато бўлганини тушуниб етди. Испаниялик ҳужумкор ярим ҳимоячи ўрнига ёш ва тезкор Баркола майдонга тушди. Айнан унинг тезлиги ора-орада "Барса" мудофаасининг тинчини буза олди. 48-дақиқада Дембеленинг ўхшамаган узатмасига аранг етиб борган Килиан тўпни рақиб жарима майдони марказига етказиб берди. Ҳимоячилардан қайтган тўп Усмонга келиб тушди. Француз битта ҳаракат билан Де Йонгни ортда қолдириб қайтариб бўлмас алламбало зарбаси билан беллашувда ҳисобни очди. Ушбу голдан кейин ҳали ўзига келиб улгурмаган "Барселона" кўп ўтмай дарвозасидан иккинчи тўпни ҳам олиб чиқди. Фабиан Руиснинг ажойиб узатмасидан сўнг Витинья рақиб жарима майдони ичига катта тезлик билан кириб борди ва оёқлари учи билан зарба йўллаб, Тер Штеген дарвозасига гол уриб кетди. Биринчи таймни устунлик билан якунлаган "Барса" футболчиларининг устидан ПСЖ "муздай сув қўйиб юборди". Бу голлар Каталония клубини ўзига келишини ёки баттар "музлашини" таъминлаши керак эди. Амалда биринчи вариант гувоҳи бўлдик. 

"Барселона" ўзгаришларга қўл урди. Жароҳатидан ҳали тўлиқ тузалмаган Педри Робертони, Фелиш эса кўп хатоларга йўл қўяётган Ямални ўрнига майдонга тушди. Айнан испаниялик хавбекнинг тўпга илк тегиниши заргарона узатма билан якунланди, Рафинья эса бу вазиятни кўкка совурса уят бўларди. Ҳисоб 2-2! Сафарда ҳаракат қилаётган Хави шогирдлари учун бу ҳисоб нисбатан қулай эди. 2:2'дан сўнг жамоалар бироз ҳовурини босиб олиб, бир-биридан чўчиб ҳаракат қилишни бошлади. Шу жойида Хави яна бир юришни амалга оширди. Таянч зонада ҳаракат қилаётган де Йонг ўрнига охирги пайтларда мажбурликдан ушбу позицияда кўп кўриниш бераётган Кристенсен ўйинга қўшилди. 79-дақиқа ўтиб бораётган бир пайтда айнан Андреас бурчак зарбасидан сўнг бош билан гол уриб, "кўк-анорранглилар"ни ҳисобдаги устунлигини таъминлади. 44 ёшли мутахассиснинг ўйинга киритган "тузатишлари" максимал самара берди. Қолган дақиқаларда ПСЖ олдинга ташланди, аммо "Барса" ҳимояси фақатгина 3-4 дақиқа панд берди холос. 

Хулоса

Париж клуби ва Энрике бир-бирига у қадар мос бўлмаган "икки қутб", деб ҳисоблайман. Гарчи, ҳозирги ПСЖ тўп назоратида анча активлик кўрсатаётган бўлса ҳам боғламлар яхши ишламаслиги жамоа ўйинида яққол намоён бўляпти. Ҳужумлар асосан Мбаппе ёки Дембеленинг рейдлари ортидан вужудга келади. Тактик ишланмалар деярли кўзга ташланмайди. "Барселона"да Мбаппе даражасидаги футболчи бўлмаса ҳам тўпни ўзида хотиржам ушлаб тура оладиган кўплаб маҳоратли футболчилар ва энг муҳими майдондагиларни бирлаштириб турадиган жамоа фалсафаси бор. Аввалгидек эмас ва бунга даъво ҳам қилиша олмайди. Бироқ барибир клуб "томирига" бир марта кирган қон анча йиллар шу "томирда" айланиб юради. Бугун "Барселона" ПСЖни жамоа бўлиб ютди. Хави бошлиқ бутун бутун жамоа ғалаба учун ўз ҳиссасини қўшди. Балки Каталонияда ҳаммаси ўзгариб кетар. Энрикенинг "тулпор"лари сафарда умуман бошқача ўйин кўрсатиб, вазиятни ўз томонига оғдира олар. Бироқ Париждан "Барселона" ҳақли ва чиройли ғалаба билан қайтяпти. Энг муҳими, устунликни ўз томонларига оғдириб! 

                                                                                                                                                                                 КАРИМ Худайқулов тайёрлади