“Барса” барибир қийин трансферга қўл урди

“Барселона” клуби мутасаддилари “Атлетико Мадрид” раҳбарияти билан Хулиан Альваресни ёзги трансфер ойнасида сотиб олиш бўйича музокараларни бошлагани ҳақида хабарлар тарқатилди.

Каталонияликлар аргентиналик жаҳон чемпионини “Барселона” билан шартномаси тугаётган Роберт Левандовскининг ўрнини босиш учун асосий номзод сифатида кўрмоқда.

Маълумотларга кўра, 26 ёшли аргентиналик ҳужумчи анча вақтдан бери “Камп Ноу” эгалари назаридан тушмаган, скаутлар уни ҳали “Ривер Плейт”да ўйнаган пайтлариданоқ кузатиб келади.

Кейинчалик у “Манчестер Сити”га ўтган эди. Бироқ Эрлинг Холанд соясида қолиб кетганидан кейин Мадрид клубига ўтишни маъқул топган. Энди эса “Барселона” ёзги трансфер учун имкониятни ўрганиш мақсадида “Атлетико” билан алоқани ушлаб турибди.

Бироқ бу трансферни амалга ошириш жуда қийин экани айтилмоқда. Альварес 2024 йилда “Атлетико Мадрид”га 95 миллион еврогача етиши мумкин бўлган суммага ўтган ва унинг шартномасида 500 миллион евро миқдорида бадал пули кўрсатилган.

“Барселона” раҳбарияти бу трансферни амалга ошишида ўйинчининг шахсий истаги ва ташаббуси муҳим роль ўйнашига умид қиляпти. Илгари мадридликлар етакчиси Антуан Гризманн ҳам худди шу тарзда “Атлетико”дан “Барселона”га ўтган жди.

“Атлетико Мадрид” хўжайинлари айни пайтда ўз ҳужумчисини 120 миллион евро атрофида баҳоламоқда. Бу эса “Барса” президент Жоан Лапорта учун катта молиявий тўсиқ ҳисобданади.

Роберт Левандовскининг келажаги бу трансфер билан бевосита боғлиқ. Таҗрибали форвард келаси мавсум бошланишигача 38 ёшга тўлади. У ҳали ҳам самарали ўйин кўрсатмоқда, аммо клуб таркибда авлод алмашишини режалаштирмоқда.

Хабарларга кўра, “Ювентус” ва “Милан” клублари уни эркин агент сифатида қўлга киритиш учун асосий даъвогарлар ҳисобланади ва унга асосий таркибдаги ролни таклиф қилмоқда.

“Барселона” Левандовскига янги шартнома таклиф қилишга тайёр эди, аммо бу катта маош қисқариши ва жамоадаги роли камайишини ўз ичига олади. Футболчи эса юқори даражадаги мақомини сақлаб қолишни истаётгани учун кетиши эҳтимоли юқори. Унинг кетиши маош жамғармасида муҳим жой бўшатиб, клубга ёш ҳужумчи учун маблағ ажратиш имконини беради.

Альвареснинг агенти Фернандо Идальго яқин орада кўчиш ҳақидаги гапларни рад этди. Аввалроқ, Алвареслар оиласи Каталонияда уй қидираётгани ҳақида хабарлар чиққан эди, аммо агент бу маълумотларни тўлиқ ёлғон деб атади.

-  1000 фоиз ёлғон. Оиладан ҳеч ким Барселонада бўлган эмас. Охирги марта улар бу шаҳарга “Атлетико” ўйини учун боришган ва эртаси куни Мадридга қайтишган, - деди Фернандо Идальго.

Барселона» ҳужум чизиғини кучайтириш учун бошқа вариантларни ҳам кўриб чиқмоқда. Маркус Рэшфорд масаласи ҳам долзарб бўлиб қолмоқда. “Манчестер Юнайтед” футболчиси ҳозир Испанияда ижарада ўйнамоқда ва у Ханси Фликда яхши таассурот қолдирган.

Клубда уни 30 миллион еврога сотиб олиш имконияти бор, аммо бу суммани тўлашга шошилмаяпти ва бошқа вариантларни ҳам кўриб чиқмоқда.