"Барса": Дўст бўлсанг, Холандни олиб кел!

“Mundo Deportivo” нашрининг маълум қилишича, “Барселона” раҳбарияти Эрлинг Холанд учун курашга қайтган.

Гарчи каталонияликларнинг имконияти “Манчестер Сити” ва “Реал”никидан паст саналаётган бўлса-да, улар норвегиялик тўпурарни ўз жамоасига олиб келиш умидини йўқотгани йўқ.

Маълумотларга қараганда, 21 ёшли ҳужумчининг ўйини клуб президенти Жоан Лапортага жуда ёқади. Шу боис клуб раҳбарининг ўзи шахсан ўйинчининг агенти Мино Райола билан боғланиб, Холандни Каталонияга олиб келишни сўраган.

Холанднинг харидорларига муаммо туғдираётган энг катта масала Мино Райола ва ўйинчининг отаси Альф-Инге Холандга тўланадиган катта миқдордаги комиссиялардир. Лапорта бу масалани ҳал қилишда Райола билан дўстлик муносабатларидан фойдаланмоқчи.