“Барса”, “Реал”, “Атлетико” манфаатлари бир футболчида тўқнашди

Нидерландия чемпионатида порлаётган “АЗ Алкмаар” жамоаси ярим ҳимоячиси Кес Смит Испания Ла Лигаси грандларининг трансфер қизиқишлари рўйхатидан жой олди.

Журналист Хосе Феликс Диаснинг хабар беришича, 20 ёшли футболчи учун “катта учлик”нинг барча вакиллари – “Барселона”, “Реал” ва “Атлетико” даъвогар қилмоқда.

Бироқ трансфер бу ёзда амалга ошиши эҳтимоли кам: мадридликлар таркибни тўлиқ шаклланган деб ҳисоблаб, футболчилар кетмаган тақдирда ҳеч кимни сотиб олишни режалаштирмаяпти; “кўк-анорранглилар” эса бутун эътиборини Родри трансферига қаратган; “матрасчилар” эса 40 миллион евро тўлаб, Мортен Юльманни сотиб олган ҳолда ярим ҳимоя чизиғини аллақачон кучайтирди.

Transfermarkt версиясига кўра, Кес Смитнинг бозор баҳоси 25 миллион еврони ташкил этади, аммо “АЗ Алкмаар” ундан анча кўпроқ, яъни 60 миллион евро сўраётгани ҳам трансферга тўсқинлик қилади. Нидерландиялик футболчининг шартномаси 2028 йилда якунланади.