“Барса” ва “Реал” гол уриш бўйича янги рекорд ўрнатган ҳужумчини талашяпти

“Бавария” сафига 2023 йили қўшилган англиялик ҳужумчи Ҳарри Кейн бир жамоада энг тез 100 та гол уриш бўйича янги рекорд ўрнатди. 32 ёшли форвард мюнхенликлар таркибида жами 104 та учрашувда рақиблар дарвозасини 100 марта ишғол қилди.

Аввалги рекорд “Реал”да ўйнаган Криштиану Роналду ва “Манчестер Сити” етакчиси Эрлинг Холандга тегишли бўлиб, ҳар иккиси 100 та гол уриш учун 105 тадан учрашувда майдонга тушган.

Sport Bild нашрининг ёзишича, Кейннинг сермаҳсул ўйини Испаниянинг икки гранди – “Барселона” ва “Реал” раҳбарияти эътиборини тортди.

Манбага кўра, Ҳарри Кейннинг Бундеслига клуби билан шартномасида ҳужумчини 2026 йилнинг ёзида 68 миллион евро миқдоридаги бадал пули эвазига трансфер қилиш имконини берувчи банд киритилган. Бу банд ишга тушиши учун англиялик форвард “Бавария”дан кетиш истагини билдириши керак.

“Барселона” ва “Реал” мутасаддилари жорий мавсумдан кейин тажрибали тўпурарни ўз жамоаларига ўтишга кўндириб кўрмоқчи. Ҳарри Кейнга Англия Премьер-лигасидан бир неча клуб ҳам ҳамкорлик таклиф қилишга тайёрлигини билдирган.