"Барса" хўжайинлари Флик янги юлдузни ўйнатмаётганидан норози

«Барселона» янги мавсумни жуда ишонарли бошлади – жамоа кетма-кет саккиз ўйинда ғалаба қозонди. Шу билан бирга, El Nacional нашри ёзишича, клуб ичида бош мураббий Ханс-Дитер Фликнинг бир қарори борасида қониқмаслик бор.

Ёш ҳужумчи Ҳамза Абдулкарим мавсум олди йиғинларида ўзини жуда яхши томондан кўрсатган эди. Клуб раҳбарияти ва мутахассислар ундан расмий учрашувларда ҳам майдонга тушиб, тажриба орттиришини кутган. 

Аммо Флик ҳозирча унга ишончни чеклаб қўйган: Абдулкарим фақат битта ўйинда ўйин охирида захирадан майдонга туширилди, қолган учрашувларда эса 18 ёшли футболчи бутун 90 дақиқани захира ўриндиғида ўтказди.

Маълумотларга кўра, Флик ҳали Абдулкарим ўйиннинг айрим жиҳатларида ўсиши керак, деб ҳисоблайди. Шунинг учун ҳам унга мунтазам ўйин амалиёти беришга шошилмаяпти.

«Шу билан бирга, клуб ичида бу камчиликларни айнан ўйин амалиёти орқали бартараф этиш мумкин, деган фикр устун», – дея таъкидланади мақолада.

«Барселона» навбатдаги учрашувини 10 октябрь куни ўз майдонида «Хетафе»га қарши ўтказади.