"Барселона" 100 миллион евролик ҳужумчи сотиб олмоқчи

"Барселона" клуби келаси мавсум учун трансферлар рўйхатини шакллантирмоқда.

"Sport.es" нашрининг хабар беришича, "Атлетико"да ўйнаётган ҳужумчи Хулиан Альваресга Каталония жамоаси жиддий қизиқиш билдирмоқда. Манбага кўра, "кўк-анорранглилар" раҳбарияти Альваресни ёзги трансфер ойнаси учун асосий трансфер мақсади сифатида белгилаган. 25 ёшли ҳужумчининг бозор қиймати 100 миллион еврога баҳоланмоқда.

Маълумот учун, аргентиналик форварднинг "матрасчилар" билан амалдаги шартномаси 2030 йил июнь ойи охирида тугайди. Хулиан ушбу Ла Лига мавсумида 20 та ўйинда майдонга тушиб, еттита гол урган ва учта голли узатма берган.