"Барселона" Чемпионлар лигаси дебютантини ўрганиб чиқди

Германиянинг «Штутгарт» клуби ҳимоячиси Финн Ельч Каталониянинг «Барселона»си ва Миланнинг «Интер» жамоаси трансфер рўйхатига киритилгани хабар қилинмоқда.

Инсайдер Экрем Конурнинг ижтимоий тармоқларда маълум қилишича, ушбу икки топ клуб скаутлари Ельчнинг ўйинини Чемпионлар лигаси умумий босқичида Норвегиянинг «Викинг» жамоасига қарши баҳсда яқиндан кузатган.

Ёш ҳимоячи учун трансфер баҳоси 50–60 миллион евро атрофида баҳоланмоқда. 20 ёшли футболчининг «Штутгарт» билан амалдаги шартномаси 2030 йил ёзига қадар мўлжалланган.

Жорий мавсум Германия чемпионатида Финн Ельч тўртта учрашувда майдонга тушди, бир голли узатма амалга оширди ва бир марта сариқ карточка олди.