"Барселона" "Реал"нинг Альварес бўйича ҳаракатини олдиндан билган

Мадриднинг "Реал" клуби "Атлетико" ҳужумчиси Хулиан Альваресни ўз сафига қўшиб олишга уриниб кўрди, аммо трансфер амалга ошмади.

"Қироллик клуби" аргентиналик футболчи учун 150 миллион евро таклиф қилган бўлса-да, "Атлетико" рақибига ўз етакчисини сотишдан бош тортди.

"Mundo Deportivo" нашрининг хабар беришича, "Барселона" раҳбарияти "Реал"нинг бу қадамини аввалдан тахмин қилган. Флорентино Перес 150 миллион евролик таклиф тайёрланаётганини маълум қилгач, каталонияликлар гап айнан Альварес ҳақида кетаётганини тушуниб етган.

Манбага кўра, мадридликларнинг бу ҳаракати "Барселона" учун вазиятни янада мураккаблаштирган. Чунки каталония клуби Альваресга қизиқиш билдирса-да, бундай миқдорда маблағ сарфлашга тайёр эмас.

Transfermarkt портали 26 ёшли ҳужумчининг бозор қийматини 100 миллион евро деб баҳоламоқда. Унинг "Атлетико" билан амалдаги шартномаси 2030 йилга қадар мўлжалланган.