"Барселона" ёш футболчиси билан шартномани узайтирди

18 ёшли испаниялик ярим ҳимоячи Марк Берналь "Барселона" билан шартномасини узайтирди, дея хабар берди клуб матбуот хизмати.

Футболчи билан тузилган янги келишув 2029 йилнинг июнигача мўлжалланган.

Қайд этилишича, шартнома имзоланиши бугун, 29 сентябрь куни эрталаб клуб офисида "Барселона" президенти Жоан Лапорта, биринчи витсе-президент Рафаэль Юсте ва футбол бўлими директори Деку иштирокида бўлиб ўтган.

Жорий мавсумда Берналь "кўк-анорранглилар" сафида 2 та ўйинда майдонга тушди ва 1 та голли узатмани амалга оширди. Хавбек "Барселона" асосий жамоасида жами бешта ўйин ўтказди.

Ла Лиганинг 7 туридан сўнг "Барселона" 19 очко билан мусобақа жадвалида пешқадамлик қилмоқда.