"Барселона"нинг "Камп Ноу" реконструкцияси учун ажратилган маблағ тугамоқда

"Барселона" клубининг машҳур "Камп Ноу" стадиони ва унинг атрофидаги инфратузилмани қайта қуриш лойиҳаси жиддий молиявий муаммоларга дуч келди. Бу ҳақда "Marca" нашри хабар бермоқда.

Манба маълумотларига кўра, аввал ажратилган маблағлар барча режалаштирилган ишлар учун етарли бўлмаслиги мумкин. Клуб президенти Жоан Лапорта бошчилигидаги раҳбарият "Goldman Sachs" банки томонидан тақдим этилган 1,45 миллиард евро миқдоридаги кредит линияси деярли тўлиқ сарфлаб бўлинганини, лойиҳа эса ҳали якунланишдан анча узоқ эканини тан олган.

Шу муносабат билан клуб қўшимча молиялаштириш учун аъзолардан рухсат сўраш имкониятини кўриб чиқмоқда. Бу масала июль ойида ўтказилиши режалаштирилган навбатдан ташқари умумий йиғилишда муҳокама қилиниши мумкин.

Ҳозирда ишлар нафақат "Камп Ноу"да, балки "Espai Barca" лойиҳасининг бошқа объектларида ҳам давом этмоқда. Улар қаторига "Палау Блауграна" аренаси ва собиқ "Лес Кортс" стадиони ҳудудлари ҳам киради.

Айни пайтга келиб реконструкциянинг 1С босқичи якунланган бўлиб, стадион сиғими 62 657 томошабингача оширилди. Ҳозирги асосий ишлар икки қаватли "VIP" секторлар ва учинчи ярус трибуналарини қуришга қаратилган.

Лойиҳанинг жорий босқичида қарийб 9400 та "VIP" ўриндиқ барпо этилиши кўзда тутилган бўлиб, унинг 2027 йил ёзида якунланиши режалаштирилмоқда. Шундан кейин энг мураккаб босқич — стадион томини ўрнатиш ва конструкциянинг компрессион ҳалқаларини қуриш ишлари бошланади.

Қурилишнинг якуний босқичи вақтида "Барселона" эҳтимол 2027/28 йилги мавсум бошида ўз стадионини вақтинча тарк этишига тўғри келади. Бироқ жамоа ўша даврда уй учрашувларини қаерда ўтказиши ҳозирча аниқлаштирилмаган.