«Бавария» Шерки ҳақидаги миш-мишларга муносабат билдирди

«Манчестер Сити»нинг ҳужумкор ярим ҳимоячиси Райан Шерки қишки трансфер ойнасида «Бавария» сафига қўшилмайди. Бу ҳақда спорт журналисти Кристиан Фальк маълум қилди.

Унинг маълумот беришича, матбуотда тарқалган миш-мишларга қарамай, мюнхенликлар Шеркини қишда сотиб олиш ниятида эмас. Ҳатто француз футболчисининг номзоди «Бавария»нинг расмий трансфер рўйхатларида ҳам бўлмаган. Журналистга бу ҳақда клубнинг спорт директори Макс Эберль маълумот берган.

Фалькнинг таъкидлашича, «Бавария» одатда январ ойида катта трансферлар амалга оширмайди. Фақат жамоа етакчиларидан бири оғир жароҳат олган тақдирдагина режалар ўзгариши мумкин.

Райан Шерки жорий мавсумда турли мусобақалар доирасида олти ўйинда майдонга тушди, икки бор рақиб дарвозасини ишғол қилди ва яна икки голга ассистентлик қилди.