Беллингем учун 150 миллион евро таклиф келди! “Реал” уни сотадими?

“Реал Мадрид” клуби жамоанинг 22 ёшли ҳужумкор футболчиси Жуд Беллингем учун 150 миллион евролик таклиф олди. Англиялик ўйинчи жамоадаги асосий фигуралардан ҳисобланади.

Маълум бўлишича, бу таклиф Беллингемннинг юрти Англиядан, янада аниқроқ айтганда, “Манчестер Юнайтед”дан бўлди.

“Олд Траффорд” эгалари Беллингемни Англияга қайтаришга интилмоқда. Клуб уни ўз спорт лойиҳасининг янги юз қилишни хоҳлайди ва бунинг учун катта молиявий ресурсларини сарфлашга тайёр.

150 миллион евро — кўпчилик учун рад этиб бўлмайдиган сумма бўлса-да, “Реал” раҳбарларига бу камлик қилади. Мадридликларнинг жавоби  аниқ: Жуд Беллингем ҳеч қандай пулга сотилмайди.

“Қироллик клуби” Беллингемни 130 миллион еврога харид қилганига икки йилдан ошди ва англиялик футболчи жамоанинг муҳим ўйинчиларидан бири даражасига кўтарилди.

Беллингем футболчилик фаолиятидан ташқари клуб учун медиа ва савдо активига айланди. Унинг имижи, шахсияти ва мухлислар билан алоқаси клубга уни фақат майдондаги ҳиссаси учун эмас, балки “Реал Мадрид” брендини дунёга намойиш этувчи символ сифатида баҳолаш имконини берди.

Англиядан тарқатилаётган хабарларга кўра, “Манчестер Юнайтед” биринчи таклифи рад этилгани билан Беллингемни олиш ҳаракатини тўхтатмайди. Чунки клуб хўжайинлари бу Жудни ўз лойиҳасини тиклаш учун идеал ўйинчи, деб билади. У манчестерликларга жамоа ярим ҳимоясини ўзгартирадиган ва клубни Европа элитасига қайтара оладиган етакчи сифатида кўриняпти.

Шу боис, “Юнайтед” янада каттароқ сумма бериши мумкин. Кейинги таклиф 180 миллион евродан юқорироқ бўлиши кутиляпти.