Бензема жамоа танлади, лекин йўли тўсилган

Мадриднинг “Реал” клуби собиқ ҳужумчиси Карим Бензема фаолиятини Германиянинг “Байер” клубида давом эттиришни истамоқда.

Журналист Илиес Қаддури X ижтимоий тармоғида хабар беришича, футболчи ва клуб ўртасида алоқа ўрнатилган ва француз футболчиси трансферга катта қизиқиш билдирган.

Манбага кўра, Бензема леверкузенликларнинг лойиҳасини собиқ жамоадошлари Мусса Диаби ва Лукас Васкес билан муҳокама қилган. Маълум қилинишича, эҳтимолий трансферга футболчининг Саудия Арабистони элчиси сифатида имзолаган шартномаси тўсқинлик қилмоқда. Ушбу шартнома 2030 йилгача амал қилади.

38 ёшли футболчининг агентлари ушбу шартнома шартларини юмшатиш мақсадида музокаралар олиб бормоқда. Бензема қишда “Ал-Иттиҳод”дан “Ал-Ҳилол”га ўтган, ёзда эса клуб билан шартномани бекор қилиб, эркин агент мақомида тарк этган.