Coca-Cola Суперлиганинг 9-турида “Қўқон-1912” ўз майдонида “Насаф” жамоасини қабул қилди ва ушбу учрашувда 2:2 ҳисобидаги жанговор дуранг қайд этилди.

Қизиқ жиҳати шундаки, ушбу клубларнинг шу кунга қадар чемпионатимизда ўтказган учрашувларида бирор марта ҳам 2:2 ҳисоби қайд этилмаган.

Статистика шуни кўрсатяптики, мазкур тўқнашувга қадар бўлиб ўтган 22 та баҳснинг 14 тасида “Насаф” ютган ва фақат 5 та ўйинда қўқонликларнинг қўли баланд келган. 3 марта эса дуранг кузатилган. Ушбу дурангларнинг иккитаси 1:1 ва биттаси 0:0 ҳисобларида тугаган.

Янада эътиборлиси, жамоалар ўртасидаги беллашувлардаги илк дуранг икки йил олдин, 2018 йилги мавсумда кузатилган. Унгача эса у ёки бу жамоанинг қўли баланд келган. Кўриб турганингиздек, жорий мавсумдаги 23-тўқнашувда жамоалар биринчи маротаба 2:2 ҳисобини қайд этишди.