Биринчи даврада умуман ютқазмаган АГМК охирги тўртта ўйиндан бери мағлуб бўляпти. Навбатдаги рақиб эса

Миржалол Қосимов бошчилигидаги АГМК клуби узоқ парвоздан кейин энди бироз пастга шўнғиётганга ўхшайди. Олмалиқликлар охирги тўртта турдан бери рақибларига фақат ютқазиб келяпти. Қизиғи, бу жамоа биринчи даврада ҳаммани ажаблантирган ҳолда ҳеч кимга ютқазмаган ягона клуб эди.

Гарчи АГМК тўртта турдан бери мағлубиятга учраётган бўлса ҳам кучли учликда тушмай келмоқда. Чунки бунгача йиғиб қўйган очколари сабабли бошқалардан анча илгарилаб кетган.

Хўш, Миржалол Қосимов жамоасининг мағлубиятли серияси қачонгача давом этаркин? 24-турда эса АГМК ўз майдонида Суперлигада қолиш учун курашаётган “Андижон”ни қабул қилади.

агмк2

Агар ушбу клубларнинг ўзаро ўйинлар тарихига қарайдиган бўлсак, навбатдаги тўқнашуви 20-қарама-қаршиликка айланади. Ҳозирча катта устунлик мезбонлар тарафида. 19 та беллашувнинг 11 тасида АГМКнинг қўли баланд келган. “Андижон” эса 4 та ўйинда ғолиб чиққан. Яна 4 та учрашувда кучлар тенг келган. Қизиғи, андижонликлар Олмалиқ майдонида ҳали ғалаба қозонмаган. Қолаверса, бу рақибини охирги марта 2011 йилги мавсумда Андижондаги стадионда 1:0 ҳисобида мағлуб этган.

Кўриб турганингиздек, ушбу клубларнинг ўзаро ўйинлар статистикаси бўйича қарайдиган бўлсак, АГМК яққол фаворит сифатида кўринмоқда. Мағлубиятлар исканжасига тушиб қолган клуб “Андижон” билан баҳсда бунга нуқта қўядими? Аммо унутмаслик керакки, андижонликлар ҳам янги мураббий бошчилигида Суперлигада қолиш учун астойдил курашмоқда ва ўтган турдаги ғалаба уларни руҳлантириши табиий.    

Матнда хатолик топсангиз, ўша хатони белгилаб, бизга жўнатинг (Ctrl + Enter)