Биз яна ютқазамиз. Гвардиола “Сити”нинг энг катта муаммосини айтди

“Манчестер Сити” бош мураббийи Хосеп Гвадиола жорий мавсумда жамоаси тўқнаш келаётган муаммолар якуний натижага таъсир қилишини айтди.

- Ҳозирча биз фақат бир марта мағлуб бўлдик. Лекин яна ютқазишимиз мумкин. Айни пайтда мусобақа жадвалида жуда кучли ҳисобланган “Ливерпуль”дан икки очкога ортда қоляпмиз.

Чемпионлар лигасини муваффақиятли бошлаб олдик. Лекин одамлар биздан чемпионатнинг 38 та турида ҳам фақат ғалаба кутишини, ҳар мавсум треблга эришишимизни талаб қилишини яхши биламан. Буни амалга оширишга ҳалақит қилаётган энг катта муаммо кўп ўйинчиларимиз сафдан чиқаётганидир.

Баъзан треблга эришиш учун жамоада жароҳатлар бўлмаслиги керак, аммо бу гал вазият ундай эмас. Оскар Бобб мавсумолди йиғинларида асосий ўйинчимиз эди, жароҳат туфайли сафдан чиқди. Родри жаҳоннинг энг яхши ўйинчиси сифатида “Олтин Тўп” олди, бироқ биз усиз ўйнаб, жуда қийналяпмиз. Борган сари вазият қийинлашиб бораверади, - деди Хосеп Гвардиола.