Бобоусмон Олимпиадага йўл очди!

Иорданияда давом этаётган лицензион турнирда Бобоусмон Батуров (-69 кг) иккинчи жангини ўтказди. У чорак финал босқичида хитойлик Кионг Ерсунга қарши рингга кўтарилди. Маълумки, ушбу вазн тоифасига 5 та йўлланма тикилган. Жанг ғолиби Токио Олимпиадасига йўлланмани қўлга киритар эди.
Жуда муҳим бўлган ушбу жангнинг биринчи раунди кутилганидек ҳамюртимизнинг босими билан бошланди. Хитойлик боксчи қарши зарбалар билан жавоб беришга ҳаракат қилди.

Иккинчи раундда ҳам юртдошимиз биринчи рақамли бўлди. Рақиб эса одатдагидек қарши ҳужумда ушлаб, аниқ зарбалар йўллашга уринди. Бироқ Батуров фаол бўлди ва бу ҳисобда ҳам акс этди.
Учинчи раунд яна одатий тарзда юртдошимизнинг фаол ҳаракатлари билан бошланди. Боксчилардан кураш услубларини ҳам томоша қилдик.

Якунда, Бобоусмон ўзининг иштиёқи ва фаоллиги эвазига ғалаба қозониб, ярим финалга йўл олиш билан бирга Токио Олимпиадасига йўлланмани ҳам қўлга киритди.