Бобур Акбаров: "Биринчи даврада йўқотилган очколар бизга дарс бўлди"

«Қўқон-1912» жамоасининг тажрибали ҳимоячиси Бобуржон Акбаров биринчи даврадаги омадсизлик ва иккинчи давра учун олиб борилаётган тайёргарликлар ҳақида қисқа интервью берди.

«Барчага Ассалому алайкум. Жамоамиз Про лиганинг биринчи даврасини учинчи ўринда якунлади. Бу ўрин нафақат қўқонлик мухлисларга, балки бизга ҳам ёқмаяпти. Баъзи ўйинларда бизга омад етишмади, баъзида эса бизга барқарорлик етишмади.

Менимча, биринчи даврада йўқотилган очколар бизга дарс бўлди ва иккинчи даврага тайёргарликни шунга қараб бошладик. Тайёргарликнинг биринчи қисмида Тошкент вилоятининг тоғли ҳудудида асосан жисмоний ҳолатни мукаммал ҳолатга келтириш учун ҳаракат қилдик. Йиғин давомида жамоа вакилларига ажойиб шароит яратиб беришди ва биз ҳам шунга яраша аъло тарзда тайёргарлик кўрдик, деб ўйлайман.

Қўқонда бошлаган йиғинда эса биз асосан тактика ва техникага ишламоқдамиз. 2-давра бошлангунга қадар барча футболчилар максимал шай ҳолатда бўлади, деб умид қиламан. Жамоамизнинг жонкуяр ашаддий ва содиқ мухлисларига оилавий бахт ва хотиржамлик тилайман. Худо хоҳласа, 2-даврада ғалабаларимиз ва йил якунида Суперлига йўлланмаси билан уларнинг кайфиятини янада кўтаришга биз футболчилар боримизни беришга тайёрмиз», - деб фикрини якунлади жамоа етакчиларидан Бобуржон Акбаров.

"Қўқон-1912" матбуот хизмати.