"Болонья" стадионини таъмирлайди. Сабаб эса "Евро-2032" турнири

Италиянинг "Болонья" жамоаси ўз уй стадиони ҳисобланувчи "Ренато Далл'Ара"ни реконструкция қилади.

Италия клуби таъмирлаш ишларини бошлаш учун "Webuild Group" билан эксклюзив ҳамкорлик шартномаси имзоланганини эълон қилди. 2027 йилнинг охиригача давом этадиган ҳамкорлик клуб томонидан Болонья муниципалитети билан биргаликда ишлаб чиқилган йирик лойиҳанинг бир қисмидир.

Янги стадион шаҳарга 2032 йилги Европа чемпионати ўйинларини ўтказишга номзод бўлиш имконини бериши кутилмоқда. Режалаштирилган инвестицияларнинг умумий ҳажми 200 миллион еврога баҳоланмоқда.

Лойиҳанинг бир қисми ҳудудни қайта ободонлаштиришни ҳам ўз ичига олади. Бу ерда иш пайтида клубнинг уй учрашувларини ўтказадиган кичикроқ ҳажмдаги стадион қурилади.

"Webuild Group" аллақачон бутун дунё бўйлаб 9 та йирик стадионларни, жумладан Миландаги "Сан-Сиро" ва Қатардаги "Ал-Байт" ўйингоҳларини қурган ва таъмирлаган.