Боян Цигер: "Шартномани узайтирдим"

Бу йил “Нефтчи” клубининг чемпионлигига муносиб ҳисса қўшган сербиялик 31 ёшли легионер Боян Цигер фарғоналик мухлисларнинг севимли футболчиларидан бирига айланган.

Цигер Суперлигада “Нефтчи” сафида 25 та ўйинда майдонга тушди ва 3 та гол урди. Шунингдек, Кубок баҳсида ҳам 3 та учрашувда қатнашди.

Sports.uz журналисти эса ушбу легионер билан суҳбатлашди.

- “Нефтчи” сафида Ўзбекистон чемпионлигини қўлга киритдингиз. Мақсадга эришганингиздан кейин ўзингизни қандай ҳис қилдингиз?

- Жуда чиройли ва ажойиб байрам бўлди. Мухлислар бу кунни 24 йил кутишди. Якун эса супер ва жуда зўр бўлди, деб ўйлайман.

- Сиз учун мавсумдаги энг қийин ўйин қайси бўлди?

- Энг қийин ўйин, менимча, “Насаф”га қарши бўлиб ўтди. Ўшанда футболчимиз майдондан четлатилганди. Ўшанда оғир учрашув бўлган, стадионда мухлислар билан тўлган. Ҳа, бу чемпионлик ўйини бўлганди.

- Виталий Левченконинг кетишига муносабатингиз қандай? Буни кутмаганмидингиз?

- Бу саволга ҳеч нарса дея олмайман. Мен буни ҳал қилмайман. Бу фақат менга боғлиқ эмас.  

- Жамоанинг янги бош мураббийи Ислом Исмоилов билан гаплашдингизми?

- Йўқ, ҳозирча гаплашмадим.

- “Нефтчи” билан шартномангиз тугаётганди, кейинги режалар қандай?

- Ҳа, “Нефтчи”да қолдим. Куни кеча шартномани узайтирдим. Икки йилга шартнома туздим.

- Таклифлар ҳам бўлгандир-а?

- Ҳа, менга таклифлар Ўзбекистондан ҳам, бошқа мамлакатлардан ҳам бўлди. Лекин мен “Нефтчи”да қолдим. Биз келишдик, қўл ташлашдик ва жамоада қолдим.

- Легионер сифатида биринчи марта чемпионликка эришдингиз. Бошқа мамлакатда чемпион бўлиш қандай экан?

- Биринчи марта Ўзбекистонда чемпион бўлдим. Ўз вақтида “Навбаҳор”да ўйнаган пайтимда чемпионлик учун бир очко етмай қолганди. Кубок финалига ҳам чиққанди, аммо мағлубиятга учрагандик. Худога шукрки, “Нефтчи” билан чемпионликка эришдим.

- Сиз учун мавсумнинг энг яхши футболчиси ким?

- Мавсумни энг яхши футболчиси ким бўлиши мумкин? Тўғриси, мен ҳеч нарса дея олмайман. Ҳамма ўйинчилар жуда яхши. Улар ўртасидаги фарқ жуда кам. Шу сабабли мен бирортасини алоҳида ажратиб кўрсата олмайман.

- Чемпионликка эришилгандан кейин клуб томонидан бонуслар ваъда қилган. Сизларга қандай бонуслар берилди?

- Бонуслар масаласига келсак, ҳаммани шартномасида бонус ёзиб қўйилган. Бонус ҳаммага тенг ва холисона тақсимланади.