Бразилияда оммавий жанжал: "Крузейро" ва "Атлетико Минейро" ўйинчиларига 23 та қизил карточка берилди

Бразилиядаги Кампеонато Минейро финалида "Крузейро" ва унинг принципиал маҳаллий рақиби "Атлетико Минейро" ўйинчилари ўртасида юзага келган оммавий жанжал оқибатида жами 23 нафар футболчи қизил карточка олди.

Якшанба куни Белу-Оризонти шаҳрида бўлиб ўтган учрашувдаги тўқнашув ўйиннинг қўшимча дақиқаларида, "Крузейро"нинг 1:0 ҳисобидаги ғалабаси пайтида бошланди. "Атлетико" дарвозабони Эверсон тўп учун курашда тўпни қўлидан чиқариб юборганидан кейин, тўпга етиб олишга ҳаракат қилган ярим ҳимоячи Кристиан билан тўқнашди ва уни регби услубида ерга йиқитди.

Эверсон тиззаси билан Кристианнинг устига босди, бу пайтда дарвозабоннинг юзига тегиб кетди. Шундан сўнг у ерда ётган рақибига бақириб, Кристианнинг бел қисмига босим ўтказишда давом этди. Бу эса "Крузейро" футболчиларининг ғазабли реакциясига сабаб бўлди. Улар Эверсонга ташланиб, уни дарвоза томон итаришди ва натижада оммавий жанжал бошланди.

Аввалига дарвоза ёнида бошланган жанжал майдоннинг иккинчи ярмигача ёйилди. Футболчилар бир-бирини тепиш, муштлаш ва итариш билан давом этган тўқнашувни хавфсизлик ходимлари ҳамда бошқа масъуллар ажратишга ҳаракат қилди. Жанжалга захирадаги ўйинчилар ва мураббийлар штаби аъзолари ҳам аралашди. Тўқнашув бир дақиқадан ортиқ давом этди.

"O Globo" нашри хабарига кўра, ўйиннинг ўзида ҳеч ким майдондан четлатилмаган бўлса-да, ҳакам кейинчалик вазиятни кўриб чиқиб, жами 23 та қизил карточка кўрсатган: уларнинг 12 таси "Крузейро" футболчиларига, 11 таси эса "Атлетико Минейро" ўйинчиларига берилган.

"Бу жуда ачинарли ҳолат. Мен ҳали ҳеч қачон футбол ўйинида бундай зўравонликни кўрмаганман. Биз бундай намуна кўрсатмаслигимиз керак, чунки бу бутун дунё бўйлаб акс-садо беради. Биз ўз обрўйимиз ва клуб нуфузини асрашга масъулмиз", — деди "Атлетико"нинг собиқ ҳужумчиси ва Бразилия терма жамоаси ўйинчиси Ҳалк. 

"Крузейро" бош мураббийи Тите эса ғалабадан кейин мухлисларга қўллаб-қувватлови учун миннатдорлик билдирди.

"Мен “Крузейро” мухлисларига ўзимнинг меҳрим ва ҳурматимни етказмоқчиман. Баъзан менинг малакаларим етарли бўлмаслиги мумкин, аммо мухлисларга бўлган ҳурмат, меҳнат, қадр-қиммат ва ҳалоллик — энг муҳими шу", — деди у.