Бу энг ёмон трансфер! Трамп энди баскетболга аралашяпти
АҚШ президенти Дональд Трамп Миллий баскетбол ассоциацияси (НБА) юлдузи Лука Дончичнинг "Даллас Маверикс"дан "Лос-Анджелес Лейкерс"га ўтиши спорт тарихидаги "энг ёмон битим" бўлиши мумкинлигини айтди ва бу трансферни қайта кўриб чиқишга чақирди, деб хабар бермоқда CBS News.
Маълумот учун, 2025 йил февралида НБАнинг беш карра "Барча юлдузлар учрашуви" иштирокчиси Дончич "Даллас"дан "Лейкерс"га алмашув орқали ўтган, унинг ўрнига Энтони Дэвис Техас клубига йўл олган. Словения терма жамоаси етакчиси 2023/24 йилги мавсумдаги мунтазам чемпионатнинг энг самарали ўйинчиси ва финал иштирокчиси сифатида танилган. 2019 йилда у НБАнинг энг яхши янги ўйинчиси деб топилган. 2017 йилда эса Словения терма жамоаси билан бирга Европа чемпиони бўлган.
"Сизларга очиғини айтаман, мен бу келишувни тушунмадим. Бу фойда келтирадиган битим эмас. Бу тарихга энг буюк спорт келишуви сифатида кирмайди. Аксинча, спорт тарихидаги энг ёмон битим сифатида ёдда қолиши мумкин — биз буни қайта кўриб чиқишимиз мумкин эди. Мен доим келишувларни қайта кўриб чиқаман. Улардан яхши тушунаман. Лекин айнан шу битимни умуман тушунмадим", — деди Трамп "Даллас Маверикс"нинг уй майдонида бўлиб ўтган республикачи партия қурултойида.
"Маверикс" клубининг асосий эгаси Мириам Адельсон оиласи ҳисобланади. У Республикачилар партиясининг йирик ҳомийларидан бири бўлиб, Las Vegas Sands қиморхона операторини назорат қилади ва Дональд Трамп билан яқин алоқаларга эга.
Фикрлар