Бу иш амалга ошса, Шомуродов “Реал” юлдузи билан ўйнайди! (фото)

“Рома” раҳбарияти “Реал” юлдузларидан Искони ўз сафига қўшиб олишга қарор қилди, деб хабар тарқатди Испаниянинг AS нашри.

Манбанинг таъкидлашича, римликлар арманистонлик легионер Генрих Мхитарян кетганидан кейин унинг ўрнига жамоа ҳужумларини ташкил этадиган тажрибали плеймейкер қидираётган эди.

“Рома” Исконинг трансферини бир неча кун ичида расмийлаштиришга уринмоқда.

30 ёшли ярим ҳимоячининг мадридликлар билан амалдаги шартномаси якунланиб бўлган ва айни пайтда футболчи эркин агент мақомида.

Иско “Реал”га 2013 йили “Малага”дан кўчиб ўтган. Мадрид клубидаги фаолияти давомида плеймейкер жами 353 маротаба майдонга тушиб, рақиблар дарвозасини 53 марта ишғол қилган ва жамоадошларига 56 та голли пас узатган.

Бу ўйинчи “Қироллик клуби” сафида жами 19 та совринга эга чиқди.

Искога римликлардан ташқари, “Милан” ва “Фиорентина” ҳам жиддий қизиқиш билдирмоқда.