Бу мусобақада "Реал" "Барселона"дан анча ортда қолиб кетган!

SPORTS.uz Испания супер кубоги борасидаги энг қизиқарли маълумотлар билан таништириб ўтади

Жамоалар

13 та суперкубокни "Барселона" ўз фойдасига ҳал этган. Ушбу мусобақадаги илк ғалабасини Каталония жамоаси 1983 йилда қўлга киритган. Сўнгги бор эса, 2018 йилда "Барса"га тенг келадиган жамоа Испанияда топилмаган.  Совринлар сони бўйича улардан кейинги ўринда "Реал" Мадрид бормоқда. "Депортиво" ҳисобида 3 та чемпионлик мавжуд. "Атлетико" ва "Атлетик"да бу кўрсаткич иккитага тенг. "Реал Сосьедад", "Сарагоса" ва "Мальорка" клублари бир мартадан шоҳсупага кўтарилган.

Финалларда энг кўп мағлуб бўлган жамоа ҳам "Барселона" саналади. Клуб нақд 10 бор ҳал қилувчи учрашувни бой берган. "Реал" ва "Атлетико" эса, 5 тадан финалда уйга қуруқ равона бўлан. "Депортиво" ва "Реал Сосьедад" финалларда мағлуб бўлмаган кам сонли жамоалар сирасига киради. "Эспаньол" эса, иккита финалда иштирок этган ва уларнинг барчасини омадсиз якунлаган.

Ғолиблар ва Месси

7 та суперкубокни Лео Месси қўлга киритган. Ундан кейинги ўринларда Пике ва Бускетс бормоқда. "Барселона"нинг бу футболчилари ҳисобида 6 тадан соврин мавжуд.

10 та финалда тўп суриш фақат Лео Мессига насиб этган. Эътиборлиси шундаки, ундан кейинги ўринларда Бускетс ва Пике бормоқда. Уларда бу сон 9 тага тенг.

Ушбу мусобақа доирасидаги 19 та учрашувда майдонга тушган Месси мутлақ етакчи. Аргентиналик футболчи бу турнирда нақд 1516 дақиқа тўп сурган. Ундан кейинги ўринларни ўз-ўзидан Бускетс (1215) ва Жерар Пике (1199) эгаллаб турибди.

Тўпурарлар борасида ҳам Леога тенг келадигани йўқ. "Барселона" сардори мусобақа давомида нақд 14 та гол киритган. У ушбу голларининг ярмини финал ўйинларида урган. Ундан кейинги ўринда 7 та гол билан Рауль бормоқда. Испаниялик афсона 12 та ўйинда майдонга тушган бўлиб, иккинчи ўринда бормоқда.

Энг ёш ва энг қария футболчилар

17 ёш-у 2 ойлик чоғида Ансу Фати "Атлетико"га қарши учрашувда майдонга тушди ва мутлақ рекорд ўрнатди. Ўтган йилги ўйинда Фати 21 йил давомида "Барселона"нинг бошқа бир футболчиси ўрнатган рекордни янгилади. Нано 17 ёш-у 3 ойлик чоғида мусобақада тўп сурган энг ёш футболчига айланган эди. Эътиборлиси шундаки, кучли учликни ҳам "кўк-анорранглилар" футболчиси якунлаб қўяди. "Реал Сосьедад"га қарши ўтган баҳсда Педри 18 ёш-у 1 ойлик эди. Айнан шу кўрсаткич учинчи ўринда турибди.

39 ёш-у 2 ойлик чоғида Амадео Карбони "Валенсия" сафида мусобақада иштирок этади. Италиялик футболчи "кўршапалаклар" сафига 32 ёшида ташриф буюради ва 41 ёшга қадар жамоа шарафини муносиб ҳимоя қилади. У Купер ва Рафа Бенитес даврида "Валенсия"нинг асосий таркиб футболчиси бўлган ва кўплаб совринларни ўзиники қилиб олган.

34 ёш-у 6 ойлик чоғида Испания суперкубогида гол киритган Ариц Адурис ҳам тарихдан ўрин эгаллаган. У турнирда гол киритишни уддалаган энг ёши катта футболчи саналади.

Мусобақадаги энг омадли мураббийлар

Бу борада ҳам "Барселона" вакиллари бошқалардан бир қадам олдинда. Афсонавий Йохан Кройф ва Пеп Гвардиола 3 тадан совринни боши узра баланд кўтарган. Кройф 3 та ғалаба қозониш учун 6 та финалда қатнашган. Улардан кейинги ўринда Зидан бормоқда.

Шу кунга қадар, фақат иккита мураббийгина турли жамоалар билан турнирда ғалаба қозонишни уддалаган.

Улардан бири ўзбек мухлислари учун яхши таниш болган Эктор Купер бўлса, иккинчиси Эрнесто Вальверде саналади. Купер аввалига "Мальорка", кейин "Валенсия" билан бу трюкни амалга оширган. Ундан кейин Вальверде "Атлетик" Бильбао ва "Барселона" билан чемпион бўлган.