"Бу сафар жамоага кўп нарса етишмади" - Мирко Еличич "Олимпик"нинг мағлубияти ҳақида

Про лиганинг 7-турида Тошкентнинг "Олимпик" клуби "Жайхун" жамоасини қабул қилди.

Ушбу беллашувда Мирко Еличич бошқарувидаги "Олимпик" 1:2 ҳисобида имкониятни бой бериб қўйди ва натижада турнир жадвалида ўзидан пастки қаторда бўлган рақибини олдинга ўтказиб юборди. "Олимпик" эса мусобақа жадвалида 6 очко билан 5-ўринни эгаллаб турибди.

Кўриниб турибдики, "Олимпик" жамоасининг про лигадаги натижалари у қадар яхши эмас. Балки бундай муваффақиятсизликлар вақтинчалик бўлиши ҳам мумкин. Лекин ҳозирги пайтда жамоа тезроқ кичик инқироздан чиқиб кетиши керак.  

Бош мураббийи Мирко Еличич эса "Олимпик" - "Жайхун" ўртасидаги ўйиндан кейин ўз фикрларини билдириб ўтди. Бу ҳақида клуб матбуот хизмати маълум қилди.

- Албатта, ўйиндан унчалик мамнун эмасман. Баҳсни таҳлил қилиш керак. Бизга нимадир етишмади. Рақиб жуда яхши ҳаракат қилди. Улар доимо максимал ҳаракат қилишади. Уларнинг кўрсатган ўйини эътирофга лойиқ. Бизга шу нарса етишмади. 

- Рақиб жуда катта иштиёқ билан ўйнади, аммо бу сизнинг жамоангизда унчалик ҳам кўринмади.

- Ҳа, баъзида ўйинчиларда иштиёқ етарли бўлмаслик ҳолатлари бўлиб туради. Аммо сиз профессионал сифатида ҳар ўйинга максимум иштиёқ билан чиқишингиз керак. Меҳнат қилишга тайёр бўлишингиз лозим. Бу сафар жамоага кўп нарса етишмади.

- Ҳозирда жамоада кўплаб йўқотишлар бор. Бундан ташқари, кейинги ўйинда Муҳаммадюсуф Файзуллавнинг хизматларидан фойдалана олмайсиз, шунингдек терма жамоага йўл олган Саддам Аҳмадов бор. 

- Албатта, бошқа футболчиларга имкон берамиз. Айрим ўйинчилар майдонга тушишмаяпти. Уларга ўзларини кўрсатиш учун имкон берилади. Буни таҳлил қилиб кўрамиз.