Бунақа маошга “Реал”дан кетсанг арзийди

Англиянинг икки қудратли клуби – “Манчестер Юнайтед” ва “Ливерпуль” таркибни кучайтириш мақсадида “Реал” клуби таянч ярим ҳимоячиси Орельен Тчуаменига қизиқиш билдирмоқда.

Ҳар икки клуб франциялик футболчини катта маош билан ўзига жалб қилмоқчи. Улар Тчуаменига йилига 12 миллион евродан маош тўлашга тайёр.

Бу ҳақда Defensa Central хабар бермоқда.

Манбага кўра, Тчуаменига таклифлар келиб тушаётганига қарамай, мадридликлар 26 ёшли футболчини сотиш вариантини кўриб чиқмаяпти. Тчуамени ҳам испан грандини тарк этишни истамайди.

Томонлар ўзаро ҳамкорликни давом эттириш бўйича янги шартнома устида иш олиб бораётгани таъкидланди.

Жорий мавсумда Тчуамени 41 та ўйинда иштирок этиб, 2 та гол ва 2 та голли узатма қайд этди. Унинг клуб билан шартномаси 2028 йил ёзигача амал қилади.

Transfermarkt портаои маълумотига кўра, футболчининг бозор қиймати 75 миллион еврога тенг.