Бундеслига дарвозабонлари мавсум олдидан “шок ва даҳшат”да!

Янги мавсум бошланиши билан Германиянинг биринчи ва иккинчи Бундеслигасига Adidas Torfabrik тўпи қайтарилади. Бу эса кўплаб дарвозабонларнинг норозилигига сабаб бўлди.

Bayern & Germany нашри футболчиларнинг муносабатларини келтирди.

Аввал биз Derbystar тўпи билан ўйнардик, Torfabrik эса Derbystar тўпига нисбатан тезроқ. Бу тўп билан зарба бериш яхши, шунинг учун у майдондаги футболчиларга кўпроқ мос келади. Дарвозабоннинг реакция қилиш учун вақти тўпнинг юқори тезлиги туфайли бироз камаяди. Тўпни алмаштириш ҳақидаги қарор кўплаб дарвозабонларни кутилмаганда ушлаб қолгани ва улар шок ҳамда даҳшатда экани менга маълум. Ҳеч бўлмаганда, ҳозирча менда шундай таассурот бор, - деди “Гамбург” дарвозабони Даниэль Хойер.

Дрезденнинг “Динамо” клуби ҳужумчиси Якоб Леммер ҳам “янги тўп дарвозабонлар учун ҳақиқий синовга айланди, чунки у тез ва кутилмаганда учади, самарадорлик юқори бўлиши кутилмоқда”, деди.

Манба маълумотига кўра, ушбу тўп Германия футболида 2010–2018 йилларда ҳам ишлатилган ва 2026 йилдан яна қўлланилади.

Adidas Torfabrik тўпининг қайтиши аллақачон иккинчи дивизион ўйинларида юқори самарадорликка олиб келди. Иккинчи Бундеслиганинг биринчи турида тўққизта учрашувда 31 та гол урилди.