"Бунёдкор" раҳбарияти клуб академиясининг йил сарҳисобини ўтказди ва аёллар жамоасини тақдирлади

"Бунёдкор" жамоаси раҳбарияти йил сарҳисоби бўйича клуб академияси ҳамда аёллар жамоаси билан учрашувлар ўтказди. Бу ҳақида клуб матбуот хизмати маълум қилди.

"Бунёдкор" болалар ва ўсмирлар футбол Академиясида йил якунлари бўйича раҳбарият ва мураббийлар (У-21, У-19, 1-лига, Академия жамоалари) иштирокида йиғилиш ўтказилди.

Йиғилиш давомида У-21, У-19, 1-лига ва Академия жамоалари натижаларини таҳлил қилиниб, эришилган натижаларга ижобий баҳо берилди. 

У-21 – 2-ўрин
У-19 – 4-ўрин
1-лига – 3-ўрин (ўз ҳудудида)

Академия жамоалари:
"Бунёдкор-2008" - Тошкент шаҳар Ёшлар лигаси – 1-ўрин, "Капиталбанк Кубоги" – 2-ўрин;
"Бунёдкор-2009" - Тошкент шаҳар Премиер лигаси – 4-ўрин, ЎФА биринчилиги – 4-ўрин
"Бунёдкор-2010" - Тошкент шаҳар Премиер лигаси – 1-ўрин, ЎФА биринчилиги – 3-ўрин
"Бунёдкор-2011" - Тошкент шаҳар Премъер лигаси – 1-ўрин, ЎФА биринчилиги – 1-ўрин, Туран Чуп (туркий давлатларнинг энг яхши академиялари ўртасида) – 1-ўрин, “Quanchao Cup-2025” халқаро турнири - 3-'орин
"Бунёдкор-2012" - Тошкент шаҳар Премъер лигаси – 1-ўрин, ЎФА биринчилиги – 3-ўрин
"Бунёдкор-2013" - Тошкент шаҳар Премъер лигаси – 1-ўрин.

Йиғилишда мавсум давомида юзага келган муаммолар ва таклифлар бўйича мулоҳазалар юритилиб, тегишли мутахассисларга керакли топшириқлар берилди.

Шунингдек, Академиянинг 2026 йил учун таклиф ва режалари тақдимоти ўтказилди, янги мавсумда амалга ошириладиган ишлар бўйича раҳбарият томонидан аниқ вазифалар ва мақсадлар белгилаб берилди.

Бундан ташқари, Элмира Гуламова бошчилигидаги "Бунёдкор" аёллар жамоаси  якунланган мавсумда Ўзбекистон чемпионатини 3-ўринда якунлади.

Олий лига баҳсларида 58 очко жамғариб бронза медалларга эга чиққан қизлар учун ҳам ўзига хос тадбир ташкил қилинди. Тадбирда “Бунёдкор” футбол клуби бош директори Муроджон Алиев, “Бунёдкор” академияси директори Шавкат Саидов, техник директор Виталий Ни ва албатта жамоа аъзолари иштирок этди.

Тадбирда аёллар жамоасининг бу натижаси алоҳида эътироф этилди. 2026 йилги мавсумда натижа янада яхшироқ бўлиши лозимлиги, бунинг учун раҳбарият томонидан барча шароитлар яратиб берилиши таъкидланди. Якунда қизларга Ўзбекистон футбол ассосиацияси томонидан ажратилган медаллар ва эсдалик совғалари топширилди.