"Buxoro" qachon o‘z stadioniga qaytadi?

Anchadan beri o‘z maydonidan foydalana olmay kelayotgan “Buxoro” klubi tez orada o‘z uyiga qaytadiganga o‘xshayapti. Boisi, jamoaning asosiy stadionidagi maydonni parvarishlash ishlari yakuniga etib qolayotgani xususida klub matbuot xizmati xabar bermoqda.

“Xabaringiz bor, Buxoroning “Markaziy” stadionidagi maydon chimini yangilash bo‘yicha ishlar olib borilayotgandi. Mamlakatimizning “Nasaf” va “Navbahor” jamoalari stadionlarida maydon maysasini o‘stirgan mutaxassislar endilikda bizning bosh stadionimizda ish olib borishmoqda.

Maydon drenaj tizimi butunlay yangilanib, yaqinda tayyor maysa keltirilib yotqiziladi. Hozirgi kunda maydondagi maysaning tayyor holga kelishi uchun oxirgi bosqich ishlari davom ettirilmoqda”, - deyiladi xabarda.