Бухорода ногирон-ампутантлар ўртасида “Мустақиллик кубоги” мусобақаси ўтказилди

Жорий йил 11-17 сентябрь кунлари Бухоро вилоятида футбол бўйича ногирон-ампутантлар ўртасида “Мустақиллик кубоги” мусобақаси бўлиб ўтди. Бу ҳақда Спортни ривожлантириш вазирлиги матбуот хизмати хабар тарқатмоқда.

Мусобақада жами 6та жамоа ғолиблик учун баҳс олиб боришди. Булар — “Матонат”, “Байналминал”, шунингдек Жиззах, Андижон, Фарғона ҳамда Қўқон ногирон-ампутантлар футбол клубларидир.

Ажойиб ва кескин курашларга бой тарзда ўтган ушбу мусобақада ғолибликни “Матонат” жамоаси қўлга киритган бўлса, фахрли 2-ўринни Жиззах жамоаси эгаллади. 3-ўрин эса “Байналминал” жамоасига насиб этди.

Мусобақалар якунида ғолиб ва совриндорлар ташкилотчилар томонидан муносиб тақдирланди.

Ушбу мусобақа шу йилнинг сентябрь-октябрь ойларида ногирон-ампутантлар ўртасида Туркиянинг Истанбул шаҳри мезбонлик қиладиган Жаҳон чемпионатига тайёргарлик вазифасини ўтаб беради. Мундиал баҳсларига 23 сентябрь куни старт берилади.