Бухорода қўл жанги бўйича жаҳон чемпионати бошланмоқда!

Жорий йилнинг 19-22 май кунлари Бухоро шаҳри илк бор Қўл жанги бўйича ёшлар ва ўсмирлар ўртасида Жаҳон чемпионатига мезбонлик қилади. Бугун ушбу мусобақа олдидан матбуот анжумани ташкил этилди. Унда Халқаро Қўл жанги федерацияси президенти Сергей Астахов, Халқаро қўл жанги федерацияси ҳакамлар кенгаши раиси Игорь Куфтин, Ўзбекистон Қўл жанги федерацияси раис ўринбосарлари – Бахтиёр Соатов ҳамда Бахтиёр Мирзақуловлар, Бухоро вилоят Қўл жанги федерацияси раиси иштирок этди.

Бу сафарги дунё биринчилигида сайёрамизнинг 30 га яқин мамлакатидан 400 нафарга яқин спортчилар иштирок этиши кўзда тутилган. Жумладан, ўсмирлар 9 та вазн тоифасида, ёшлар эса 8 та вазн тоифасида ғолиблик учун баҳс олиб боради. Бундан ташқари, қизлар 6 вазн тоифасида ўз омадларини синовдан ўтказишади.

Қайд этиш лозимки, Ўзбекистон қўл жанги федерацияси якка курашчилари сўнгги бир неча йиллардан буён катталар, ёшлар ва ўсмирлар терма жамоалари орасида кучлилар қаторидан ўрин эгаллаб келмоқда. Жумладан, 2021 йилнинг 4-6 июнь кунлари пойтахтимиз илк маротаба етакчи спортчилар ўртасида Жаҳон чемпионатига мезбонлик қилган ва унда Россия, Қозоғистон терма жамоаларини ортда қолдирган ҳолда Ўзбекистон қўл жанги терма жамоаси 1-ўринни эгаллаган.

Шунингдек, 2019 йил Россия федерациясининг Санкт-Петербург шаҳрида ўтказилган жаҳон чемпионатида терма жамоамиз аъзолари умумжамоа ҳисобида 2-ўринни эгаллашган.