“Челси”нинг энг яхши тўпурарларидан бири вафот этди

Лондоннинг “Челси” клуби собиқ футболчиси Бобби Тэмблинг 85 ёшида ҳаётдан кўз юмди. Бу ҳақда Sky Sports хабар қилди.

Аввалроқ Тэмблингга деменция ташхиси қўйилган эди.

1959 йилдан 1970 йилгача бўлган даврда ҳужумчи “Челси” сафида 370 та учрашувда майдонга тушиб, 202 та гол урган. Клубнинг энг яхши тўпурарлари рўйхатида у фақат Фрэнк Лэмпарддан (211 гол) орқада туради.

Тэмблинг Лондон жамоаси билан бирга 1965 йилда Англия лигаси кубогини қўлга киритган. Англия миллий терма жамоаси сафида эса учта ўйинда қатнашиб, битта гол муаллифи бўлган.