Де Зерби "Тоттенхэм" таклифини кўриб чиқишга тайёр

Роберто Де Зерби Лондоннинг "Тоттенхэм" клубидан тушган таклифни кўриб чиқишга тайёрлигини билдирди.

Аввалроқ собиқ "Марсель" бош мураббийи ёзгача Лондон клубида ишлашга рози бўлмаётгани ҳақида хабарлар тарқалган эди. Якшанба куни эса "шпорлар" Игор Тудор билан хайрлашганини расман эълон қилди.

Журналист Жанлука Ди Марцио маълумотига кўра, "Тоттенхэм" италиялик мутахассисга 5 йиллик шартнома таклиф қилган. Шунингдек, клуб унга яқин бир неча мавсум ичида кучли ва рақобатбардош жамоа тузиш бўйича кафолатлар ҳам берган.

Айнан шу омиллар Де Зербини таклифни жиддий кўриб чиқишга ундаган. Манбада айтилишича, кейинги бир неча соат ушбу музокараларда ҳал қилувчи аҳамиятга эга бўлади.

Айни пайтда "Тоттенхэм" Англия Премьер-лигаси жадвалида мавсум тугашига 7 тур қолган бир пайтда 17-ўринни эгаллаб турибди ва жамоа қуйи лигага тушиб кетиш ҳудудидан атиги 1 очко юқорида жойлашган.