"Динамо"нинг Дубайдаги йиғини якунланмоқда

Суперлига янги мавсумига тайёргарлик босқичининг сўнгги қисмини Дубайда ўтказган "Динамо" жамоаси 12 кунлик ўқув-машғулот йиғини доирасида тўртта кучли спарринг рақибга қарши майдонга тушди.

Вадим Абрамов мураббийлигидаги жамоа дастлаб Арманистон чемпиони "Урарту"га (1:3) қарши майдонга тушган бўлса, иккинчи ўйинда Россиянинг уч карра чемпиони "Локомотив"га (1:6) қарши ўйнади. Учинчи баҳсда Қозоғистоннинг уч карра чемпиони, УЕФА Конференциялар лигаси иштирокчиси "Астана"га (2:2) қарши саф тортилган бўлса, сўнгги ўйинда Валерий Карпин мураббийлигидаги "Ростов" (1:3) клуби билан учрашув ўтказилди.

Қайд этиш жоиз, Дубайдаги ўртоқлик ўйинларида натижа эмас, айнан кучли рақибларга қарши синов ўйинлари ўтказиш мақсад қилинганди. "Динамо"нинг Дубайдаги машғулотлари 24 февралга қадар давом этиб, шу куни жамоа Ўзбекистонга қайтади.

Суперлига стартидан олдинги якуний машғулотлар Тошкентда давом эттирилиши режалаштирилган.