Diqqat: Umarovdan zo‘ri yo‘q!
Mamlakatimizda kamol topgan futbolchilarning xorij mamlakatlar chempionatlaridagi ishtiroki hamisha muxlisu mutaxassislar e’tiborini o‘ziga jalb etib kelgan. Keyingi yillarda yangi avlod vakillari Italiya, Rossiya, Belarus, Ukraina, Janubiy Koreya, Qozog‘iston, Saudiya Arabistoni, Qatar, Kuvayt, Birlashgan Arab Amirliklari kabi o‘ndan ziyod mamlakatlar ligalarida to‘p tepmoqda.
Shu o‘rinda, Belarus oliy ligasi ham muxlislarimiz yoqtirgan musobaqaga aylanib qoldi. O‘tgan yili bu davlatga kelgan va hozirda Belarus chempionatiga moslashib ulgurgan Shahboz Umarovning joriy mavsumdagi o‘yini va natijalari ko‘pchilikning diqqat markazida turibdi. Ma’lumki, o‘tgan mavsumni “Energetik-BGU”da yuqori saviyada o‘tkazgan bu futbolchimiz joriy chempionatda chempionlik uchun kurashayotgan BATE sharafini himoya qilmoqda. Borisovliklar o‘zbek legioneridan jamoaning etakchisiga aylanishni kutayotgan edi. Shahboz hozircha buni uddalamoqda.
O‘zbekistonlik futbolchi dastlabki uchta turning ikkitasida o‘yin qahramoni bo‘ldi. Birinchi turda “Slutsk” darvozasini aniq nishonga olib, jamoasining mavsumdagi ilk to‘pini kiritgan edi. Keyinchalik bu gol Belarus futbol federatsiya uyushtirgan so‘rovnomada turning eng chiroyli goli, deb tan olindi.
Shahboz Umarov “Gomel”ga qarshi o‘tkazilgan uchinchi tur o‘yinida ham o‘zini ko‘rsatdi va jamoasining g‘alabasini ta’minladi. Ikkinchi bo‘lim boshidan maydonga tushgan hamyurtimiz, o‘yinga qo‘shilganidan etti daqiqa o‘tib, raqib darvozasiga yo‘l topdi va oltmish soniya ichida ikkita supergol urdi.
Uning birinchi goli jarima maydonchasi tashqarisidan yo‘llangan mukammal zarba orqali kiritildi. Umarovning "Gomel" klubi darvozasiga kiritgan aynan shu goli Belarus futbol federatsiyasi matbuot xizmati tomonidan e’lon qilingan eng chiroyli gollar to‘rtligi orasida birinchi o‘rinda e’tirof etildi.
Umuman olganda, Shahboz Umarovning uchala goli ham chiroyi va mukammal ijrosi bilan ajralib turibdi.
Yana bir quvonchli xabar shundan iboratki, o‘zbekistonlik legioner Belarus chempionati oliy ligasi uchinchi turining eng yaxshi futbolchisi, deb e’tirof etildi. Bu turda raqib darvozasini ikki marta ishg‘ol qilgan legionerimiz jami uchta to‘p bilan to‘purarlar bahsida ham etakchilik qilmoqda.
BATE futbolchilari navbatdagi bellashuvni 7 aprel kuni Belarus kubogi doirasida “Vitebsk” klubiga qarshi o‘tkazadi. Vitebsk shahridagi uchrashuv Toshkent vaqti bilan 19:00 da boshlanadi.
Shahboz Umarov ham ko‘plab iste’dodli futbolchilar kabi “Paxtakor” tarbiyalanuvchisi hisoblanadi. Biroq, katta futboldagi faoliyatini AGMK klubida boshlagan. Olmaliqliklar tarkibida avvaliga yoshlar, keyin kattalar o‘rtasidagi uchrashuvlarda bir necha bor maydonga tushgan hujumkor futbolchi 2020 yilning fevralida “Energetik-BGU”ga o‘tgan edi. U minsklik “talabalar” safida oliy liganing barcha uchrashuvlarida maydonga tushgan yagona futbolchi bo‘ldi. Shahboz 30 ta uchrashuvda to‘rtta gol urib, uchta golli pas oshirdi. Mana endi, BATEda yangi qirralarini ochmoqda.
Fikrlar