Диёр Имомхўжаев: Бу жамоанинг 1 йиллик имтиёзи сақлаб қолинади

Сурхондарё вилоятининг Денов тумани "Денов" жамоаси 2023 йилда Биринчи лига мусобақаларида иштирок этишни режалаштирмоқда. Бу ҳақда ПФЛ бош директори вазифасини бажарувчи Диёр Имомхўжаев ўзининг телеграмдаги саҳифасида маълум қилди.

"Биринчи лига мусобақасида иштирок этиш учун даъвогар бўлган "Денов" жамоаси раҳбарияти ҳамда туман ҳокими Абдумалик Алламуродов билан суҳбатда бўлдик. Насиб бўлса, "Денов" 2023 йилги мавсумда Биринчи лига мусобақасида иштирок этади.

Бунгача ЎзПФЛ томонидан талаб этилган ҳужжатлар ўз вақтида тақдим этилмаганди. Шундай бўлса-да, "Денов" пулка ўйинлари орқали қўлга киритган йўлланмасини 1 йиллик имтиёз билан ўзида сақлаб қолади. Келаси мавсумга қадар барча масала ўз вақтида ҳал этилади.

Айни вақтда туман ҳокими жамоани қўллаб-қувватлаш учун барча чора ишга солиниши юзасидан кафолат бермоқда. Биз янги лавозимга киришганига бир неча кун бўлган туман ҳокими билан апрель ойида кўришамиз ҳамда барча масалада фикр алмашиб оламиз.

ЎзПФЛ "Денов" жамоасини Тошкент мезбонлик қиладиган Ўзбекистон кубогининг саралаш учрашувларига таклиф этади", - деб ёзди Диёр Имомхўжаев.