Диёр Имомхўжаев: Умид қиламизки, катта ўйинлар тез орада Қаршига ҳам насиб этади!

Бугун Ўзбекистон Кубоги гуруҳ босқичига қуръа ташлаш маросими бўлиб ўтди. ЎзПФЛ бош директори Диёр Имомхўжаев жараён натижалари ҳақида ўз фикрлари билан ўртоқлашди:

"Ўзбекистон Кубогининг гуруҳ босқичи бизга 2 та даҳшатли гуруҳни тақдим этди: "A" ва "G" гуруҳлари.

Қизиғи, финалга Бухоро мезбонлик қилади. Аммо унда "Бухоро"нинг ўзи иштирок этиши сўроқ остида. Сабаби клуб Суперлиганинг уч вакилига қарши кураш олиб бориши керак. Шуларнинг 2 тасида у сафар ўйинида иштирок этади.

Нима бўлган тақдирда ҳам кубок ўйинларида барча жамоаларга омад тилаймиз. Менимча, бухоролик футбол мухлисларининг икки йилдан буён катта футболни ўз ареналарида томоша қила олмаётганликларига финал мезбонлиги яхши компенсация бўлди. Умид қиламизки, катта ўйинлар тез орада Қаршига ҳам насиб этади. Зеро шаҳар ва унинг бош клуби бунга муносиб".