Доннарумма уйига босқин уюштирган шахс узоқ муддатга қамалди

Суд Ильяс Ҳербушни 2023 йилда Парижда Италия терма жамоаси вакили Жанлуижи Доннарумманинг уйини босишни ташкил қилганликда айблаб, 9 йиллик қамоқ жазосига ҳукм қилди.

Бу ҳақда Le Parisien хабар берди.

Прокуратура 21 ёшли Ҳербуш учун 10 йиллик қамоқ жазосини сўраган эди. У жиноятни қамоқхона камерасидан туриб ташкил қилганликда айбланган. Ҳербуш март ойида Сен-Сен-Дени департаментидаги Вильпент қамоқхонасидан қочган, кейинчалик эса қўлга олинган. Унинг номи одамларни зўравонлик билан ушлаб туриш билан боғлиқ бир қатор жиноий ишлар бўйича тилга олинган.

Айблов томони босқиннинг иккинчи ташкилотчиси деб ҳисоблаган 22 ёшли М.Хиан учун прокурор 9 йиллик қамоқ жазосини сўраган эди. Бироқ суд уни оқлади.

Босқинни амалга оширишда йўл-йўриқ кўрсатувчи вазифасини бажарган Д.Моктар эса 5 йилга озодликдан маҳрум қилинди. У жазонинг 2 йилини шартли равишда, синов муддати билан ўтайди.

2023 йил 21 июль куни кечаси ўша вақтда ПСЖда ўйнаган Доннарумма ва унинг ҳомиладор севгилиси Париждаги авеню Монтенда жойлашган хонадонда босқинчилар томонидан калтакланган. Ҳужум қилганлар улардан қимматбаҳо буюмлар ва пулларни талаб қилган. Доннарумманинг севгилисини телефон қувватлагичи кабели билан бўғишган, кейинчалик у ҳомиласидан айрилган.

Етти нафар эркак нақд пул, заргарлик буюмлари, соатлар ва қимматбаҳо сумкаларни олиб кетган. Футболчининг баҳосига кўра, ўғирланган мол-мулкнинг умумий қиймати бир миллион еврога яқин бўлган.

2025 йилда Доннарумма ПСЖни тарк этиб, “Манчестер Сити”га ўтди.