Dzyudo. "Katta dubulg‘a" turniri ilk kunida 3 sportchimiz shoxsupaga ko‘tarildi!

Turkiyada start olgan dzyudo bo‘yicha “Katta dubulg‘a” musobaqasining birinchi kuni terma jamoamiz uchun muvaffaqiyatli o‘tdi. Kechki dasturda hamyurtimiz Sardor Nurillaev (-66 kg) ham bronza medali uchun bahsda g‘alaba qozondi.

Mo‘g‘ilistonlik tajribali Basxu Yondonperenleiga qarshi tatamiga chiqqan Sardor og‘ritish usuli bilan raqibini muddatidan avval mag‘lubiyatga uchratishga muvaffaq bo‘ldi. Shu tariqa u o‘z hisobiga 500 reyting ochkosini qo‘shib qo‘yish barobarida delegatsiyamiz hisobiga musobaqadagi uchinchi medalni taqdim qildi.

Undan oldin Diyora Keldiyorova kumush, Dilshodbek Baratov bronza medalini qo‘lga kiritgandi.