Энг қари футболчи 59 ёшида гол урди

59 ёшга кирган Казуёши Миура — дунёдаги энг кекса профессионал футболчи — деярли тўрт йиллик танаффусдан сўнг Япониянинг учинчи дивизионида иштирок этувчи “Фукусима Юнайтед” жамоаси таркибида ўзининг навбатдаги голини урди.

Ҳужумчи фаолиятидаги 42-мавсумни ўтказаётганига қарамай, Император кубоги доирасидаги учрашувда “Иваки Фурукава” дарвозасига бешинчи голни киритди. Ўйин 7:0 ҳисобида “Фукусима” фойдасига якунланди.

“Мени майдонга туширган мураббий ва барча ишонч билдирган инсонларнинг умидини оқлашни истадим”, — деди Миура клуб сайти орқали. — “Энг муҳими, биз катта ҳисобда олдинда бораётган бўлсак-да, гол урган пайтимда футболчилар, штаб аъзолари ва мухлислар биргаликда шундай қувонч билан байрам қилганини кўриб, беқиёс бахтни ҳис қилдим”.

Японияда “Қирол Казу” номи билан танилган Миура охирги марта 2022 йил ноябрида “Атлетико Сузука” сафида “ФК Осака” дарвозасига гол урган эди. Янги гол эса 25 июл куни қайд этилди ва у 34 ўйин давом этган голсиз серияга чек қўйди.

Миура 1990–2000 йиллар орасида Япония терма жамоаси учун 89 та ўйин ўтказиб, 55 та гол муаллифи бўлди. 26 июнда “Фукусима” клуби у билан шартнома 2027 йил июнига қадар узайтирилганини эълон қилди, демак, афсонавий ҳужумчи фаолиятини яна бир неча йил давом эттиради.

Миура “Фукусима” сафида “Йокогама ФК” клубидан ижара асосида ўйнамоқда. У “Йокогама”га 2005 йилда, 38 ёшида қўшилган. Жамоа таркибида 298 та ўйинда майдонга тушиб, 27 та гол урган, аммо 2020 йилдан буён J2 лигасидаги ушбу клуб учун майдонга тушмаган.

1967 йил февралда туғилган Миура 15 ёшидаёқ профессионал футболчи бўлиш орзуси билан Японияни тарк этган. У Бразилиянинг “Жувентус да Моока” клуби академиясига қўшилган. Кейинчалик Бразилияда “Сантос”, “Палмейрас” ва “Коритиба” жамоалари сафида профессионал тарзда тўп сурди. 1990 йилда Японияга қайтиб, саккиз йил давомида “Верди Кавасаки” клубида ўйнади. 1993 йилда J1 лигаси ташкил этилганидан сўнг, у кетма-кет чемпионликларни қўлга киритган жамоанинг етакчи юзига айланди.

1994 йилда Миура “Женоа” клубига ижара асосида ўтиб, Италия А сериясида ўйнаган илк шарқий осиёлик футболчига айланди. Бир йил ўтиб, у яна “Верди”га қайтиб, бу ерда жами 113 та гол урди.

Шундан сўнг у Европада Хорватиянинг “Динамо Загреб” жамоаси сафида қисқа ва голсиз даврни ўтказди. Кейинги олти йилда J1 лигасидаги “Киото Пёрпл Санга” ва “Виссел Кобе” клублари учун ўйнаб, 53 та гол муаллифи бўлди ва шундан сўнг “Йокогама”га йўл олди.

Миура 2017 йилда 50 ёш ва 7 кунлик пайтида дунёдаги энг кекса профессионал футболчи сифатида рекорд ўрнатган. У шундай қилиб 1965 йилдан бери сақланиб келаётган  Англия терма жамоаси собиқ аъзоси Стэнли Мэтьюзнинг натижасини икки кунга янгилади.