Эркинлигига қўшиб ўзлигини бой берган даҳо ёхуд Мессига нималар бўлмоқда?

Қанчалик оғир бўлмасин, энди тан олинг, “Барселона” мухлислари, Мессининг клубдаги ёрқин даврлари ўтмишда қолди. Бартомеу ўзининг сиёсий ўйинлари билан Леони яна бир мавсумга клубда олиб қолишга эришди. Аммо бундан қай тараф ютди?! Аргентиналик футбол юлдузи оёғига занжир боғлангандек ўйнамоқда. У эркин ижод нималигини сезмаётгандек. Унга қарар эканман, Ўзбекистон халқ шоири Эркин Воҳидов қаламига мансуб “Руҳлар исёни” достонининг бош қаҳрамони Назрул Ислом хаёлимга келади. Халқнинг кўзи чақноқ фарзанди забардаст ёшида ҳақиқатни тараннум этгани учун қамоққа тиқилади ва у тутқунликда эс-ҳушини йўқотади. Йиллар ўтиб, одамлар уни кўкларга кўтарганча, озод этишади. Аммо улуғ шоирнинг руҳи аллақачон ўлиб бўлганди… Лирик чекиниш учун узр сўрайман. Бу ҳолат Мессининг ҳақиқий устози ва дўсти Роналдиньо тақдирини ҳам ёдга солади. “Барселона”дан Мессининг келажагига тўсиқ бўлиб қолмаслик учун кетган Ронни келгусида ҳеч бир клубда омадли ҳаракат қила олмади. Парагвайдаги қамоқхоналарда бир неча ойлаб ўтириб ҳам чиқди.
Хоҳлардимки, Мессининг келгуси йиллардаги тақдири бундай кўриниш олмасин. Бразилиялик “афсунгар” каби аянчли тарзда фаолиятини якунлагандан кўра, шу мавсум сўнгидаёқ бутсаларини михга илгани дуруст.

Бугун Леонинг борлиги “Барселона”га қўшимча босим юклаяпти. Таркибингизда Месси бор экан, сиз авлодлар алмашинуви ва молиявий қийинчиликлар сингари баҳоналарни қила олмайсиз. Аммо клубда базўр қолган ва мажбурлигидан майдонга тушаётган футболчи бугун жамоага ортиқчалик қилаётгандек. У бир одатини тарк этмади: ҳамон жамоадан ажралиб турибди. Бироқ бу мавсум ушбу таъриф ижобий маънода ишлатилмаяпти. Орадан йиллар ўтиб, Месси номини тилга олганимизда, сўзсиз уни “Барселона” либосида кўз ўнгимизда гавдалантирамиз. Аянчлиси, бугун улар бир-бирига бегонадек. Бу футболчининг кўрсаткичларида кундек равшан бўлиб турибди. Бугунгача жами 49 маротаба зарба берган Месси атиги 4 та гол уришга эришди (пенальтилар истисно қилинган). Аниқлик даражаси қандай ёмон ҳолатда эканлигини тасаввур қилиб улгургандирсиз?! 2008 йилдан бери у 30 тадан кам гол урмай келмоқда, шу давр мобайнида 10 маротаба 40 тадан кўпроқ тўп киритишга эришган.
Унга мотивация етишмаяпти. Месси фаолиятида янгиликлар қилишни хоҳламоқда, аммо бироз кеч эмасми?! Иштиёқи етарли бўлган пайтда уни тўхтатиш қанчалик қийин кечишини “Ювентус”га қарши ўйинда кўрдик. Қолган 10 та футболчи карахт аҳволда бўлса ҳам, Леонинг бир ўзи рақиб дарвозаси олдида вазиятлар яратишга эришди. Учрашув мобайнида 10 маротаба рақибларини алдаб ўтишга урунди ва 5 тасида буни уддалади. 11 та голли вазият яратди, худди шунча зарба берди (7 таси аниқ). Юқоридаги кўрсаткичлар бўйича у баҳсдаги энг сермаҳсул футболчи.

42 ёшли Жанлуижи Буффон дарвозаси шунча урунишларга қарамай, голсиз қолди. “Ювентус”га қарши беллашув бундай муваффақиятсиз ўйинларнинг биринчиси эмасди. Бунгача Ла Лиганинг 4 та турида аргентиналик футбол юлдузи рақиблари дарвозасини 10 мартадан кўпроқ нишонга олиб, гол ура олмаган.
2018/2019 йилги натижаларга назар ташласак, мутлақо бошқача ҳолатнинг гувоҳи бўламиз. Ушбу мавсумда ҳар 90 дақиқа ҳисобидан Месси 5,68 та зарба йўллаган ва ўртача 1,22 тадан гол урган. Сўнгги пайтларда унинг зарбалари берилаётган масофалар ҳам дарвозадан анча узоқлашиб кетган. У ҳужумда ўзи учун муносиб жуфтликни топа олмаётгани сабаб, узоқ масофалардан таваккал урунишларни амалга оширмоқда. Баъзида у ҳимоячилар зич турган позициялардан ҳам тепишга интиляпти. Натижада, зарбалардаги статистика юқорида кўрсатаётганимиздек, пастлаб бормоқда. Мессига ноқулайлик туғдираётган тарафи, ярим ҳимоя ва вингер позициясидаги футболчиларнинг тинимсиз равишда ротация қилинаётгани бўлмоқда. Ансу Фатининг узоқ муддатга сафдан чиқиши эса “дард устига чипқон” бўлди. Хосеп Мария Бартомеу ва Рональд Куман мавсум бошида Луис Суаресни сотиб юборишдан нимани кўзлагани бизга қоронғу. Аммо улар Брейтуэйтни уругвайликдан кучлироқ санайдиган даражада бўлмаса керак. Антуан Гризманн эса 1,5 йил ўтиб ҳам, жамоага мослаша олмаяпти. Биз “кўк-анорранглилар”нинг ҳужумдаги муаммолари ҳақида гапирмоқдамиз. Ваҳоланки, Куманни ҳужумдан ҳам кўра, мудофаа ташвишга солмоқда. Пике, Лангле, Араухо, Мингеса - ҳеч бири ҳужумни бошлаб берадиган дастлабки пасни бера олувчи ҳимоячилар эмас. Ҳар бири худди келишиб олгандек, навбатма-навбат кулгили хатоларга йўл қўяди. Бугун каталонияликлар қанчадир миллион сарфлаб ҳужумчи олишга эмас, Ван Дейк сингари бир клуб футболини тўлиқ тартибга туширувчи ҳимоячи харид қилишга муҳтож.

Ҳа, ҳар қандай клубда ҳам бу каби етишмовчиликлар бўлиб туради. Аммо “Блаугранас”да барча муаммоларга Лео жавоб беради. “Mes que un club” - клубдан-да юқорироқ, деганда Йохан Кройф Мессини назарда тутмаган! У ҳам қолганлар сингари футболини ўйнагиси келади. Аммо футболчининг кичик жуссасига раҳбарият анча катта масъулиятни юклаб қўйган. Бу унинг эркин ижод қилишига ҳалақит бермоқда. Месси етакчилик қобилиятига эга эмас. Мана нима учун Жаҳон чемпионати финалини ютказган, нима учун ҳалигача Марадонани ундан устун кўрувчилар бор. Диего кичик гавдасидан бир неча баробар шаддотроқ, асов шижоатга эга эди. У истеъдоди етмаган паллаларда характер билан жамоасини олдинга етаклаб борган. Мессининг асосий рақобатчиси Роналдуда ҳам етакчилик қобилиятининг шакллангани унга катта ютуқлар олиб келган. Эътибор беринг, “Барса”да Пуйоль, Хави, Маскерано ва Иньеста каби етакчилар бор пайтда Месси қандай ўйнаган?! Ҳозир-чи?! Фарқ катта. Менимча, унинг ростдан ҳам кетадиган вақти келди. Аллақачон келганди! “Бу клубдан мени ҳайдашсагина, кетаман”, деган пайтларида бундай ишлар бўлишини тушида ҳам кўрмаган бўлса керак.

Январда президент сайлови бўлиб ўтади. Биз “Барса”нинг янги бошқарувчисидан Мессига тақдирини ўзи ҳал қилиш имконини беришини сўраган бўлардик. Шундоқ ҳам, шартнома ёзда якунланади ва футболчининг ўзи кетишни истаган тақдирда, ҳеч ким унга тўсқинлик қила олмайди. Аммо Лионель Мессининг “Барселона”ни тарк этиши оддий ўтмаслиги зарур. Роналду ЕЧЛ финалида “Реал” сафидаги сўнгги ўйинини ўтказаётганини билмаган эдик. Умид қиламизки, кетишни ихтиёр этган тақдирда, Леонинг хайрлашув учрашуви олдиндан маълум бўлади ва барчамиз уни олқишлар билан “Камп Ноу”дан кузатиб қўямиз.

Абдулвосид Валихонов тайёрлади