“Евро-2024”: Германия ҳужумчиси бир зарба билан мухлиснинг қўлини синдириб қўйди (фото)

Германия терма жамоаси ҳужумчиси Никлас Фюллькруг очилиш ўйини олдидан мухлислардан бирининг қўлини синдириб қўйгани маълум бўлди.

Воқеа Шотландияга қарши ўтган чемпионатнинг биринчи ўйин бошланишидан олдин рўй берган. Қизишиб олиш машғулоти чоғида Никлас тепган тўп мухлиснинг чап қўлига тегиб, уни синдирган.

- Мен мадҳияни тиббиёт замбилида куйладим. Кулишимни ҳам, йиғлашимни ҳам билмасдим. Афсуски, очилиш ўйинини томоша қилиш орзуси рўёбга чиқмади, - деди 43 ёшли Кай Флатманн.

Кўнгилсиз ҳодисадан хабар топган Германия футбол иттифоқ жабр кўрган мухлисдан узр сўраган.

Флатманн Германия терма жамоасининг иккинчи турда Венгрияга қарши бўладиган баҳсига келадиган бўлди.